മല്ലപ്പള്ളി: കടൂർക്കടവ് – മുണ്ടനോലിക്കടവ് പാലത്തിന്റെ അപ്രോച്ച് റോഡിന്റെ തകർച്ച വാഹന യാത്രക്കാർക്ക് ദുരിതമാകുന്നു. പത്തനംതിട്ട – കോട്ടയം ജില്ലകളെ ബന്ധിപ്പിക്കുന്ന പാലത്തിന്റെ ഇരുകരകളിലെയും അപ്രോച്ച് റോഡുകൾ പൂർണ്ണമായും തകർന്ന നിലയിലാണ്. കോട്ടാങ്ങൽ മണിമല റോഡിൽ നിന്നും വെള്ളാവൂർ റോഡിൽ നിന്നും പാലത്തിലേക്ക് പ്രവേശിക്കുന്ന ഭാഗത്ത് ടാറിങ് ഇളകി വൻ കുഴികളാണ് രൂപപ്പെട്ടിരിക്കുന്നത്. ഇവിടെ മെറ്റൽ ഇളകി നിരന്നു കിടക്കുന്നതിനാൽ ഇരുചക്ര വാഹനയാത്രക്കാർ അപകടത്തിൽപ്പെടുന്നത് പതിവായിരിക്കുകയാണ്.
കുഴികൾ ഒഴിവാക്കി കടന്നുപോകാൻ ശ്രമിക്കുന്നത് അപകടങ്ങൾക്കും കാരണമാകുന്നു. പാലത്തിന്റെ ഇരു കരകളിലും കുഴികൾ അടക്കുന്നതിന് രണ്ട് മാസം മുൻപ് ചിലയിടങ്ങളിൽ കോൺക്രീറ്റ് ഇട്ടെങ്കിലും കോൺക്രീറ്റും ഇളകി കുഴിയായിരിക്കുകയാണ്. പലപ്പോഴും വാഹനങ്ങൾ കൂട്ടിയിടിക്കാതെ രക്ഷപെടുന്നത് തലനാഴിക്കാണ്. മണിമല, കറുകച്ചാൽ എന്നിവിടങ്ങളിലേക്ക് പോകാൻ എളുപ്പ മാർഗമായതിനാൽ വിവിധ പ്രദേശങ്ങളിൽ നിന്നും എത്തുന്ന വാഹനങ്ങളുടെ തിരക്കുമാണ്.
