തിരുവനന്തപുരം : കാറിലെത്തിയവര് വിഷം കലര്ത്തിയ ഭക്ഷണം നല്കിയത് കഴിച്ച വളര്ത്തുനായ അടക്കം നാല് നായ്ക്കള് ചത്തു. തിരുവനന്തപുരം ചിറക്കുളം റോഡിലാണ് സംഭവം. തെരുവുനായകളെ കൊല്ലുന്നതിനായി വഴിയരികില് വെച്ച വിഷം കലര്ത്തിയ ഭക്ഷണം കഴിച്ചാണ് വളര്ത്തു നായയായ നാനോയും ചത്തത്.
രാവിലെ നടത്താന് കൊണ്ടു പോയപ്പോള് വളര്ത്തുനായയായ നാനോ വിഷം കലര്ത്തിയ ഭക്ഷണം കഴിച്ചിരുന്നതായി വീട്ടുകാര്. രാത്രിയില് കാറിലെത്തിയ സംഘമാണ് വിഷം കലര്ത്തിയ ഭക്ഷണം വഴിയോരത്ത് വെച്ചതെന്നും സംശയം തോന്നിയതിനാല് ഭക്ഷണം എടുത്ത് കളഞ്ഞിരുന്നുവെന്നും സമീപവാസികള് പറയുന്നു. കാറിന്റെ ദൃശ്യങ്ങള് സമീപത്തെ സി സി ടി വി യില് പതിഞ്ഞിട്ടുണ്ട്. തെരുവുനായകളെ ഉപദ്രവിക്കുന്നതില്നിന്ന് ജനങ്ങളെ വിലക്കിക്കൊണ്ടുള്ള സര്ക്കുലര് സംസ്ഥാന പോലീസ് മേധാവിവഴി പുറപ്പെടുവിക്കാന് കഴിഞ്ഞ ദിവസം ഹൈക്കോടതി നിര്ദേശിച്ചു.