പത്തനംതിട്ട : പ്രഖ്യാപിച്ച പദ്ധതികൾ പൂർത്തീകരിച്ച് അഭിമാനപൂർവ്വമാണ് ഭരണസമിതി പടിയിറങ്ങുന്നതെന്ന് നഗരസഭാ ചെയർമാൻ അഡ്വ. ടി സക്കീർ ഹുസൈൻ പറഞ്ഞു. നഗരത്തിൽ ഇപ്പോൾ നടക്കുന്നത് പൂർത്തീകരിച്ച പദ്ധതികൾ നാടിന് സമർപ്പിക്കുന്ന ഔദ്യോഗിക ചടങ്ങുകളാണ്. ഭരണസമിതിയുടെ ഇച്ഛാശക്തിയും ജനങ്ങളോട് ഉള്ള പ്രതിബദ്ധതയുമാണ് ഇവിടെ പ്രതിഫലിക്കുന്നത് എന്നും അദ്ദേഹം പറഞ്ഞു.
നഗരസഭ പതിനാലാം വാർഡിൽ നിർമ്മിച്ച മിനി പാർക്ക്, നവീകരിച്ച അങ്കണവാടി, സാംസ്കാരിക കേന്ദ്രം, മണ്ണുങ്കൽ കുടിവെള്ള പദ്ധതിക്ക് അനുബന്ധമായി നിർമ്മിച്ച വാട്ടർ ഫിൽറ്റർ എന്നിവയുടെ ഉദ്ഘാടനം നിർവഹിക്കുകയായിരുന്നു അദ്ദേഹം. വാർഡ് കൗൺസിലർ അഷറഫ് എ ചടങ്ങിൽ അധ്യക്ഷത വഹിച്ചു. ഡെപ്യൂട്ടി ചെയർപേഴ്സൺ ആമിന ഹൈദരാലി, ജില്ലാ ആസൂത്രണ സമിതി അംഗം പി കെ അനീഷ്, കൗൺസിലർ വിമല ശിവൻ, പൊതുപ്രവർത്തകരായ കെ ആർ അശോക് കുമാർ, തുടങ്ങിയവർ പങ്കെടുത്തു.
