കോഴഞ്ചേരി : എട്ട് ലക്ഷം രൂപ ചിലവഴിച്ച് നിര്മ്മിച്ചിട്ടും വൈദ്യുതിയും വെള്ളവും ലഭിക്കാത്തതിനാല് ഉത്ഘാടനം കഴിഞ്ഞിട്ടും ഉപയോഗിക്കാനാകാതെ കിടക്കുകയാണ് മല്ലപ്പുഴശേരി പഞ്ചായത്തിലെ കാഞ്ഞിരവേലിയില് നിര്മ്മിച്ച തീവ്ര കന്നുകാലി വികസന പദ്ധതി സബ് സെന്റര്. വയറിംഗ് അടക്കമുള്ള അനുബന്ധ ജോലികള് പൂര്ത്തിയാക്കാത്തതാണ് കെട്ടിടം പ്രവര്ത്തനമാരംഭിക്കാന് വൈകുന്നത്. സ്വന്തം കെട്ടിടത്തിലേക്ക് മാറാത്തത് കാരണം മറ്റൊരു കെട്ടിടത്തില് പ്രവര്ത്തിക്കുന്ന സെന്ററിന് മാസന്തോറും വാടക നല്കേണ്ട അവസ്ഥയാണ്. മല്ലപ്പുഴശേരി പഞ്ചായത്തിലെ കാഞ്ഞിരവേലി ചേരിക്കുന്നില് അനില്കുമാര് പഞ്ചായത്ത് സെക്രട്ടറിക്ക് ദാനമായി നല്കിയ ഭൂമിയിലാണ് ഒറ്റ മുറിയിലുള്ള കെട്ടിടം നിര്മ്മിച്ചത്.
രണ്ട് മുറികള് നിര്മ്മിക്കുവാനുള്ള അടിത്തറയാണ് നിര്മ്മിച്ചത് എങ്കിലും ഒറ്റമുറികെട്ടിടമാണ് പൂര്ത്തിയായത്. 2022-23 ലെ വാര്ഷിക പദ്ധതിയില് ഉള്പ്പെടുത്തി പൊതു വിഭാഗം വികസന ഫണ്ടില് നിന്നും 159431 രൂപയും ധനകാര്യ കമ്മീഷന് ഗ്രാന്റില് നിന്നും 240569 രൂപയും ഉള്പ്പെടെ ആകെ 400001 രൂപ വകയിരുത്തിയാണ് കെട്ടിടം നിര്മ്മിക്കാന് പ്രോജക്ട് തയ്യാറാക്കിയത്. ഒരു മുറി പണിയാനാണ് ഇത്രയും തുക വകയിരുത്തി എസ്റ്റിമേറ്റ് തയ്യാറാക്കി അംഗീകാരം വാങ്ങിയത്. കെട്ടിടം ഉപയോഗപ്പെടുത്തുന്നതിന് ആവശ്യമായ ശുചിമുറി, പ്ലംബിംഗ്, വയറിംഗ് എന്നിവ ഉള്പ്പെടുത്താതെയാണ് എസ്റ്റിമേറ്റ് തയ്യാറാക്കിയതും. ഫണ്ടിന്റെ അപര്യാപ്തതയാണ് നിലനില്ക്കുന്ന പ്രശ്നം എന്നാണ് കെട്ടിടം തുറന്നു നല്കാത്തതിന് കാരണമായി പറയുന്നത്. അങ്ങനെ എങ്കില് ഇത് ബഹുവര്ഷ പ്രോജക്ടായി ചെയ്താല് പോരെ എന്ന ജനങ്ങളുടെ ചോദ്യത്തിനും അധികാരികള്ക്ക് ഉത്തരമില്ല.
