റാന്നി : ഉദ്ഘാടനം കഴിഞ്ഞ് മാസങ്ങൾക്കുള്ളിൽ റാന്നി ബ്ലോക്ക് പടി-കോഴഞ്ചേരി റോഡിലെ പുതമൺ പുതിയ പാലത്തിന്റെ അപ്രോച്ച് റോഡില് വിള്ളല് രൂപപ്പെട്ടു. പുതമൺ കരയോട് ചേർന്ന ഭാഗത്താണ് അപ്രോച്ച് റോഡ് താഴ്ന്ന് പോയിരിക്കുന്നത്. മഴ പെയ്ത് വെള്ളം ഇറങ്ങിയതിന് തൊട്ടുപിന്നാലെയാണ് റോഡ് താഴ്ന്നുപോയത്. റോഡിൽ വൻ വിള്ളലുകൾ പ്രത്യക്ഷപ്പെട്ടതോടെ ഇതുവഴിയുള്ള യാത്രക്കാർ ആശങ്കയിലാണ്. പഴയ പാലത്തിന്റെ തൂണുകൾ താഴ്ന്നതിനെ തുടർന്നാണ് അത് പൊളിച്ചു മാറ്റി പുതിയ പാലം നിർമ്മിച്ചത്. പാലത്തിന്റെ പണികൾ അടുത്തിടെയാണ് പൂർത്തിയായത്.
എന്നാൽ നിർമ്മാണം കഴിഞ്ഞ് ചുരുങ്ങിയ നാളുകൾക്കുള്ളിൽ തന്നെ അപ്രോച്ച് റോഡ് വിണ്ടുകീറിയത് നിർമ്മാണത്തിലെ അപാകത മൂലമാണെന്നാണ് നാട്ടുകാരുടെ ആരോപണം. അതേസമയം പാലത്തിന് യാതൊരുവിധ അപകടഭീഷണിയുമില്ലെന്ന് പൊതുമരാമത്ത് അധികൃതർ വ്യക്തമാക്കി. വശം കെട്ടി മണ്ണിട്ടുയർത്തിയ ഭാഗമാണ് വിണ്ടുകീറിയതെന്നും വശങ്ങളിൽ ഇട്ട പച്ചമണ്ണ് മഴയും വെള്ളപ്പൊക്കവും മാറി വെള്ളമിറങ്ങുമ്പോൾ സ്വാഭാവികമായി താഴേക്ക് ഇരുത്തുന്നതാണെന്നും അധികൃതർ അറിയിച്ചു. റോഡിന്റെ അറ്റകുറ്റപ്പണികൾ ഉടൻ തന്നെ പൂര്ത്തിയാക്കുമെന്നും അധികൃതര് പറഞ്ഞു.
