പത്തനംതിട്ട : സംസ്ഥാനത്ത് വാണിജ്യ സിലിണ്ടര് വിലയിലുണ്ടായ വര്ദ്ധനവ് ജില്ലയിലെ ഹോട്ടലുകളെയും സാരമായി ബാധിച്ചു. വാണിജ്യ സിലിണ്ടറുകള്ക്ക് 3085 രൂപയാണ് നിലവിലെ വില. ഒറ്റയടിക്ക് 993 രൂപയാണ് ഒരു സിലിണ്ടറിന് കേന്ദ്ര സര്ക്കാര് വര്ധിപ്പിച്ചത്. ഇതോടൊപ്പം ഉയര്ന്ന കടവാടകയും കൂലി വര്ധനയുമെല്ലാം ഹോട്ടലുകളെ കൂടുതല് പ്രതിസന്ധിയിലാക്കും. സിലിണ്ടര് കിട്ടാതെ വന്നതോടെ പല ഹോട്ടലുകളും അടച്ചുപൂട്ടിയിരുന്നു. ഇതിന് ശേഷം വിറകടുപ്പും കുറ്റിഅടുപ്പും ഉപയോഗിച്ചാണ് പല ഹോട്ടലുകളും പാചകം ചെയ്തുകൊണ്ടിരിക്കുന്നത്. മൂന്നും നാലും സിലിണ്ടറുകള് ഒരു ദിവസം ചിലവാകുന്ന ഹോട്ടലുകളും ജില്ലയിലുണ്ട്.
സിലിണ്ടറുകള് കിട്ടാനില്ലാത്ത സാഹചര്യം ജില്ലയിലെ ഹോട്ടലുടമകള്ക്ക് തിരിച്ചടിയായതിന് തൊട്ടുപിന്നാലെയാണ് കേന്ദ്ര സര്ക്കാര് പാചകവാതകത്തിന് വില വര്ദ്ധിപ്പിച്ചത്. സിലിണ്ടര് ക്ഷാമത്തെ തുടര്ന്ന് പല ഹോട്ടലുകളും പൊറോട്ടയും ചായയും താത്കാലികമായി നിര്ത്തലാക്കിയിരുന്നു. ഇതിന് കൂടുതല് ഗ്യാസ് ചിലവാകും എന്നതിനാലായിരുന്നു ഈ നടപടി. സിലിണ്ടര് വില കൂടുമ്പോള് ഭക്ഷണത്തിനും വില വര്ദ്ധിപ്പിക്കേണ്ടി വരുന്നത് പൊതു ജനങ്ങളെയും സാരമായി ബാധിക്കും. നിലനില്പ്പിന്റെ ഭാഗമായി ഹോട്ടലുകള് ഇപ്പോള് തന്നെ ഭക്ഷണങ്ങള്ക്ക് വില ഉയര്ത്തിയിട്ടുണ്ട്.
