ഭോപ്പാല്: മധ്യപ്രദേശില് ‘ദ കേരള സ്റ്റോറി’ക്ക് നികുതിയിളവ്. മുഖ്യമന്ത്രി ശിവരാജ് സിങ് ചൗഹാന് ട്വിറ്ററിലൂടെയാണ് ഇക്കാര്യം അറിയിച്ചത്. തീവ്രവാദത്തെക്കുറിച്ചുള്ള ഭയപ്പെടുത്തുന്ന സത്യം തുറന്നുകാട്ടിയ ചിത്രമാണ് ‘ദ് കേരള സ്റ്റോറി’യെന്നും ചൗഹാന് ട്വിറ്റ് ചെയ്തു. വിവാദങ്ങള്ക്കും പ്രതിഷേധങ്ങള്ക്കുമിടെ ‘ദ കേരള സ്റ്റോറി’ മെയ് 5നാണ് തിയറ്ററുകളില് എത്തിയത്.
മധ്യപ്രദേശില് മതപരിവര്ത്തനത്തിനെതിരെ ഞങ്ങള് ഇതിനകം നിയമം ഉണ്ടാക്കിയിട്ടുണ്ട്. ഈ ചിത്രം അവബോധം സൃഷ്ടിക്കുന്നതിനാല് എല്ലാവരും ഈ സിനിമ കാണണം. മാതാപിതാക്കളും കുട്ടികളും പെണ്മക്കളും ഇത് കാണണം. അതുകൊണ്ടാണ് ‘ദി കേരള സ്റ്റോറി’ എന്ന ചിത്രത്തിന് മധ്യപ്രദേശ് സര്ക്കാര് നികുതി രഹിത പദവി നല്കുന്നതെന്നും ചൗഹാന് പറഞ്ഞു. ലൗ ജിഹാദ്, മതപരിവര്ത്തനം, തീവ്രവാദം എന്നിവയുടെ ഗൂഢാലോചനകളും അതിന്റെ നികൃഷ്ടമായ മുഖവും സിനിമ തുറന്നുകാട്ടുന്നതായി മുഖ്യമന്ത്രി പറഞ്ഞു. സുദീപ്തോ സെന് രചനയും സംവിധാനവും നിര്വഹിച്ച ‘ദ കേരള സ്റ്റോറി’യുടെ ട്രെയിലര് റിലീസ് ചെയ്തത് മുതല് വ്യാപക പ്രതിഷേധം ആരംഭിച്ചിരുന്നു.
