പത്തനംതിട്ട: പത്തനംതിട്ട ജില്ലയിൽ പാറ ഉൽപ്പന്നങ്ങൾ ഉൾപ്പെടെയുള്ള നിർമ്മാണ സാമഗ്രികൾക്ക് വില വർദ്ധിപ്പിക്കാനുള്ള ക്വാറി അസോസിയേഷന്റെ നീക്കത്തിനെതിരെ കേരള സ്റ്റേറ്റ് കെട്ടിട നിർമ്മാണ തൊഴിലാളി കോൺഗ്രസ് (KSKNTC – INTUC) ശക്തമായ പ്രക്ഷോഭത്തിന് ഒരുങ്ങുന്നു. കോറി ഉടമകളുടെ ഏകപക്ഷീയമായ തീരുമാനം യാതൊരു കാരണവശാലും നടപ്പിലാക്കാൻ അനുവദിക്കില്ലെന്ന് ജില്ലാ പ്രസിഡന്റ് നഹാസ് പത്തനംതിട്ട പറഞ്ഞു. വില വർദ്ധിപ്പിക്കാനുള്ള ഈ തീരുമാനം നടപ്പിലായാൽ ജില്ലയിലെ നിർമ്മാണ മേഖല പൂർണ്ണമായും സ്തംഭിക്കുന്ന അവസ്ഥയുണ്ടാകും. ഇത് പാവപ്പെട്ട കെട്ടിട നിർമ്മാണ തൊഴിലാളികളുടെ ഉപജീവനമാർഗ്ഗം തകർക്കുന്നതും അവരെ വഞ്ചിക്കുന്നതുമായ നിലപാടാണ്. അതിനാൽ ഈ ജനദ്രോഹ തീരുമാനം നടപ്പിലാക്കാതിരിക്കാൻ ജില്ലാ കളക്ടർ അടിയന്തിരമായി ഇടപെടണമെന്നും വിഷയത്തിൽ കൃത്യമായ നടപടികൾ സ്വീകരിക്കാൻ ഭരണകൂടം തയ്യാറാകണമെന്നും ജില്ലാ കമ്മിറ്റി ആവശ്യപ്പെട്ടു.
സംഘടനയുടെ പ്രവർത്തനം ജില്ലയിൽ കൂടുതൽ ശക്തമാക്കുന്നതിന്റെ ഭാഗമായി ഷമീർ തടത്തിൽ (സംസ്ഥാന നിർവാഹ സമിതി അംഗം), റെനി കൊടുവശ്ശേരി, ജിതിൻ പോൾ (ജില്ലാ വൈസ് പ്രസിഡന്റ്മാര്) എന്നിവരെ സംസ്ഥാന പ്രസിഡന്റ് അഡ്വ. ടി. ശരത്ചന്ദ്ര പ്രസാദ് നോമിനേറ്റ് ചെയ്തു. നിർമ്മാണ മേഖലയെ തകർക്കുന്ന കോറി ഉടമകളുടെ നീക്കത്തിനെതിരെ പുതിയ ഭാരവാഹികളുടെ നേതൃത്വത്തിൽ ശക്തമായ പ്രക്ഷോഭ പരിപാടികൾക്ക് ജില്ലയിൽ രൂപം നൽകുമെന്നും ജില്ലാ പ്രസിഡന്റ് നഹാസ് പത്തനംതിട്ട പറഞ്ഞു. കൂടുതൽ വിവരങ്ങൾക്ക് – നഹാസ് പത്തനംതിട്ട (ജില്ലാ പ്രസിഡന്റ്) 9645078707
