റാന്നി: പേ വിഷബാധയേറ്റ് മരിച്ച റാന്നി പെരുനാട് സ്വദേശി അഭിരാമിയുടെ മരണത്തിനു പിന്നാലെ കുടുംബത്തിൽ വീണ്ടും ദുരന്തം. അഭിരാമിയുടെ അച്ഛന്റെ അമ്മാവൻ സോമൻ കുഴഞ്ഞു വീണു മരിച്ചു. തെരുവ് നായയുടെ കടിയേറ്റ് ചികിത്സയിലായിരുന്ന അഭിരാമി ഇന്ന് ഉച്ചയോടെയാണ് മരിച്ചത്. അഭിരാമി ചികിത്സയിലായിരിക്കുമ്പോൾ കുടുംബത്തിന്റെ ആശങ്കകൾ മാധ്യമങ്ങൾക്ക് മുന്നിലെത്തി പങ്കുവെച്ച ആളാണ് കുഴഞ്ഞുവീണു മരിച്ച സോമൻ.
അഭിരാമിയുടെ അച്ഛൻ ഹരീഷിന്റെ അമ്മയുടെ സഹോദരനാണ്. ഏറെ നാളായി ആരോഗ്യ പ്രശ്നങ്ങളുണ്ടായിരുന്നു. ചൊവ്വാഴ്ച രാവിലെ ധനകാര്യ സ്ഥാപനത്തിലെത്തി മടങ്ങുമ്പോൾ സോമൻ കുഴഞ്ഞു വീഴുകയായിരുന്നു. തുടർന്ന് പത്തനംതിട്ടയിലെ ഒരു സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയായിരുന്നു. വൈകിട്ട് അഞ്ചു മണിയോടെയാണ് മരണം.
