പത്തനംതിട്ട : ഇന്നലെ നടന്ന പോപ്പുലര്ഫ്രണ്ട് ഹര്ത്താലിനിടെ പന്തളത്ത് കെ.എസ്.ആര്.ടി.സി. ബസിന് നേരെ കല്ലെറിഞ്ഞയാള് പോലീസ് പിടിയില്. ഹരിപ്പാട് ചെറുതല സ്വദേശിയും പന്തളം മങ്ങാട് താമസക്കാരനുമായ സനോജിനെയാണ് പോലീസ് ശനിയാഴ്ച അറസ്റ്റ് ചെയ്തത്.
ഹര്ത്താല്ദിനത്തില് രാവിലെ 6.40-ഓടെയാണ് പന്തളത്തുനിന്ന് പെരുമണ്ണിലേക്ക് പോയ കെ.എസ്.ആര്.ടി.സി. ബസിന് നേരെയാണ് കല്ലേറുണ്ടായത്. ആക്രമണത്തില് ബസ് ഡ്രൈവറുടെ കണ്ണിന് പരിക്കേറ്റിരുന്നു. സ്കൂട്ടറിലെത്തിയ രണ്ടുപേരാണ് കല്ലെറിഞ്ഞതെന്നായിരുന്നു ജീവനക്കാര് നല്കിയ മൊഴി. തുടര്ന്ന് പോലീസ് നടത്തിയ അന്വേഷണത്തിലാണ് ഒരു പ്രതിയെ പിടികൂടിയത്.പിടിയിലായ സനോജാണ് സ്കൂട്ടറിന്റെ പിന്സീറ്റിലിരുന്ന് ബസിന് നേരെ കല്ലെറിഞ്ഞതെന്ന് പോലീസ് പറഞ്ഞു. കേസില് സ്കൂട്ടര് ഓടിച്ചയാളെയും പിടികൂടാനുണ്ട്. പിടിയിലായ പ്രതിയില്നിന്ന് ഇയാളെക്കുറിച്ചുള്ള വിവരങ്ങളും പോലീസിന് ലഭിച്ചിട്ടുണ്ട്.
