മല്ലപ്പള്ളി: കടൂർക്കടവ് കൊല്ലാറപ്പടിയിൽ പ്രളയത്തിൽ തകർന്ന സംരക്ഷണഭിത്തി പുനർ നിർമ്മിക്കാത്തത് അപകട സാധ്യത വർദ്ധിപ്പിക്കുന്നു. കോട്ടയം – പത്തനംതിട്ട ജില്ലകളെ ബന്ധിപ്പിക്കുന്ന പ്രധാന റോഡിലെ സംരക്ഷണഭിത്തി തകർന്ന് ഒരു വർഷമായിട്ടും പുനർ നിർമ്മിക്കാത്തതിൽ പ്രതിഷേധവും ശക്തമാകുകയാണ്. സംരക്ഷണഭിത്തിയില്ലാത്തതിനാൽ ഇതുവഴിയുള്ളവാഹന യാത്ര ഭീതി ഉയർത്തുകയാണ്. 20 അടിയോളം നീളത്തിൽ ഇടിഞ്ഞ് ഈ ഭാഗം നദിയില് പതിച്ചതോടെ വാഹനങ്ങൾ സൈഡ് നൽകി കടന്നുപോകുന്നത് വൻ ദുരന്തത്തിന് വഴിയൊരുക്കും. പഴകിയ ടാര് വീപ്പ സ്ഥാപിച്ചു മുന്നറിയിപ്പു നല്കിയതോടെ അധികൃതരുടെ ഉത്തരവാദിത്വം കഴിഞ്ഞെന്നമട്ടിലാണ് കാര്യങ്ങള്. തിരക്കേറിയ റോഡായതിനാൽ അപകടം ഒഴിവാക്കാൻ അടിയന്തിരമായി സംരക്ഷണ ദിത്തി പുനർ നിർമ്മിക്കണമെന്ന നാട്ടുകാരുടെയും യാത്രക്കാരുടെയും ആവശ്യം ശക്തമായിരിക്കുകയാണ്.
