തണ്ണിത്തോട് : മേടപ്പാറയിലേക്കുള്ള റോഡ് കാലങ്ങളായി തകര്ച്ച നേരിട്ടിട്ടും തിരിഞ്ഞുനോക്കാതെ തണ്ണിത്തോട് ഗ്രാമപഞ്ചായത്ത്. തണ്ണിത്തോട് ഗ്രാമപഞ്ചായത്തിലെ മൂന്നാം വാര്ഡില് ഉള്പ്പെടുന്നതാണ് മേടപ്പാറ റോഡ്. കാലങ്ങളായി റോഡ് ടാറിംഗ് നടത്താതെ വന്നതോടെ കുണ്ടും കുഴിയുമായി റോഡില് വാഹന യാത്ര തീര്ത്തും ദുഷ്കരമായി മാറിയിരിക്കുകയാണ്. ഏകദേശം പതിനാല് വര്ഷത്തോളമായി റോഡ് ടാറിംഗ് നടത്തിയിട്ടെന്നാണ് പ്രദേശവാസികള് പറയുന്നത്. സാധാരണക്കാരായ തൊഴിലാളികള് ഉള്പ്പെടെ ഒട്ടേറെപ്പേര് റോഡിന് ഇരുവശവും താമസിക്കുന്നുണ്ട്. എന്നിട്ടും റോഡ് നന്നാക്കാന് ജനപ്രതിനിധികള് തയ്യാറായിട്ടില്ല.
റോഡിന് ഓട നിര്മ്മിക്കാത്തതിനാല് മഴക്കാലത്ത് മേടപ്പാറയുടെ വിവിധ ഭാഗങ്ങളില് നിന്നും ഒഴുകി ഇറങ്ങുന്ന വെള്ളം റോഡിലൂടെയാണ് ഒഴുകുന്നത്. ഇതാണ് റോഡ് തകര്ച്ചയ്ക്ക് പ്രധാന കാരണമായി നാട്ടുകാര് പറയുന്നത്. വലിയ ഇറക്കമുള്ള റോഡില് ടാറിംഗ് ഇളകി മാറിയതോടെ വലിയ കുഴികളാണ് റോഡില് പലയിടത്തും. ഇരുചക്ര വാഹനയാത്രക്കാര് ഈ കുഴികളില് വീണ് പരിക്കേറ്റ സംഭവങ്ങളും അനവധിയാണ്. സ്ഥലത്തെ ഗ്രാമപഞ്ചായത്ത് അംഗവും റോഡിന്റെ അറ്റകുറ്റപ്പണികള് നടത്തുന്നതില് വേണ്ടത്ര ശ്രദ്ധ കൊടുക്കുന്നില്ല എന്നാണ് പ്രദേശവാസികളുടെ പരാതി. രാത്രിയില് വെളിച്ചം കുറവുള്ള റോഡില് കാട്ടുപന്നി ശല്യവും വര്ധിച്ചിട്ടുണ്ട്.
