ഷാർജ : മലീഹയിലെ ഗോതമ്പ് പാടത്ത് രണ്ടാംഘട്ട വിളവെടുപ്പ് ആരംഭിച്ചു. ഷാർജ ഭരണാധികാരിയും സുപ്രീം കൗൺസിൽ അംഗവുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി വിളവെടുപ്പിൽ പങ്കെടുക്കുകയും ഫാമിന്റെ അഡ്മിനിസ്ട്രേറ്റീവ് കെട്ടിടം ഉദ്ഘാടനം ചെയ്യുകയും ചെയ്തു. കൃഷിയിടം നടന്നുകണ്ട ശൈഖ് സുൽത്താൻ മണ്ണിന്റെയും ധാന്യങ്ങളുടെയും സാംപിളുകളും ഗോതമ്പിന്റെ ഭക്ഷ്യയുത്പന്നങ്ങളും പരിശോധിച്ചു. അത്യാധുനിക യന്ത്രങ്ങളും ഉപകരണങ്ങളും ഉപയോഗിച്ചുള്ള വിളവെടുപ്പ് പ്രക്രിയയും അദ്ദേഹം വീക്ഷിച്ചു.
വിളവെടുപ്പിന് ശേഷമാണ് ഫാമിന്റെ അഡ്മിനിസ്ട്രേറ്റീവ് കെട്ടിടം ഉദ്ഘാടനം ചെയ്തത്. 1,670 ചതുരശ്ര മീറ്റർ വിസ്തീർണമുള്ള കെട്ടിടത്തിൽ ബയോടെക്നോളജി ലബോറട്ടറി ഉൾപ്പടെയുള്ള വിപുലമായ സൗകര്യങ്ങളുണ്ട്. ഗോതമ്പിന്റെ ജനിതക വിശകലനത്തിന് സംഭാവനകൾ നൽകാൻ ഉതകുന്ന ലാബിന്റെ പ്രവർത്തനങ്ങളെക്കുറിച്ചും നൂതന ഉപകരണങ്ങളെക്കുറിച്ചും ഉദ്യോഗസ്ഥർ അദ്ദേഹത്തിന് വിശദീകരിക്കുകയും ചെയ്തു.
