കോന്നി : ആഗസ്ത് 5,6,7 തീയതികളിലായി പത്തനംതിട്ടയിൽ നടക്കുന്ന സി പി ഐ പത്തനംതിട്ട ജില്ലാ സമ്മേളനത്തിന്റെ ഭാഗമായി ജില്ലയിലെ എല്ലാ നിയോജക മണ്ഡലങ്ങളിലും വിവിധ വിഷയങ്ങളിൽ സെമിനാറുകൾ സംഘടിപ്പിക്കുന്നതിനോട് അനുബന്ധിച്ച് നടക്കുന്ന സി പി ഐ കോന്നി മണ്ഡലം സെമിനാർ 18ന് തിങ്കളാഴ്ച്ച ഉച്ചക്ക് 2 മണിക്ക് തണ്ണിത്തോട് ഡോൺ ബോസ്കോ ഓഡിറ്റോറിയത്തിൽ നടക്കും. മലയോര മേഖലയിലെ പട്ടയം, ബഫർ സോൺ എന്ന വിഷയത്തിൽ സംഘടിപ്പിക്കുന്ന സെമിനാർ മുൻ വനം മന്ത്രിയും സി പി ഐ സംസ്ഥാന കൗൺസിൽ അംഗവും ആയ കെ രാജു ഉദ്ഘാടനം ചെയ്യും.
കിസാൻ സഭ സംസ്ഥാന സെക്രട്ടറി എ പി ജയൻ മോഡറേറ്റർ ആയിരിക്കും. സി പി ഐ ജില്ലാ അസിസ്റ്റന്റ് സെക്രട്ടറി മലയാലപ്പുഴ ശശി വിഷയ അവതരണം നടത്തും. സി പി ഐ സംസ്ഥാന കൗൺസിൽ അംഗം പി ആർ ഗോപിനാഥൻ, മണ്ഡലം സെക്രട്ടറി കെ രാജേഷ്, ജില്ലാ എക്സിക്യൂട്ടീവ് അംഗം എം പി മണിയമ്മ, കർഷക സംഘം സംസ്ഥാന വൈസ് പ്രസിഡന്റ് ഓമല്ലൂർ ശങ്കരൻ, കെ പി സി സി അംഗം ബാബു ജോർജ്, സി പി ഐ കൂടൽ മണ്ഡലം സെക്രട്ടറി സി കെ അശോകൻ തുടങ്ങിയവർ സംസാരിക്കും.
