പത്തനംതിട്ട : പുനലൂര് – മൂവാറ്റുപുഴ സംസ്ഥാന പാതയിലെ പ്രധാന പാലങ്ങളിലൊന്നായ കുമ്പഴ പാലത്തിന്റെ അപ്രോച്ച് റോഡിന്റെ ഒരു വശം ഇടിയുന്നത് അപകട ഭീഷണിയുയര്ത്തുന്നു. പാലത്തിന്റെ ഗര്ഡറുകള് അപ്രോച്ച് റോഡുമായി ചേരുന്ന ഭാഗത്താണ് കാലങ്ങളായി മണ്ണിടിഞ്ഞ് വീണുകൊണ്ടിരിക്കുന്നത്. ഈ ഭാഗത്ത് ക്രാഷ് ബാരിയര് സ്ഥാപിച്ചിട്ടുണ്ടെങ്കിലും ക്രാഷ് ബാരിയറിന് അടിഭാഗത്തെ മണ്ണ് മുഴുവന് ഇടിഞ്ഞു പോയി. ഇടിഞ്ഞ ഭാഗത്ത് കാട് കയറി കിടന്നിരുന്നതിനാല് ഇത് ആരുടേയും ശ്രദ്ധയില്പ്പെട്ടിരുന്നില്ല.
കഴിഞ്ഞ ദിവസം മഴക്കാലപൂര്വ്വ ശുചീകരണ പ്രവര്ത്തികളുടെ ഭാഗമായി പാലത്തിലെ കാടുകള് നീക്കം ചെയ്തപ്പോഴാണ് അപകട ഭീഷണിയുടെ ആഴം ജനങ്ങള്ക്ക് മനസിലായത്. ദിവസവും നൂറുകണക്കിന് വാഹനങ്ങളാണ് ഈ വഴി യാത്ര ചെയ്യുന്നത്. പൊതുമരാമത്ത് പാലം വിഭാഗത്തിനാണ് സംരക്ഷണ ഭിത്തി നിര്മ്മിക്കേണ്ടതിന്റെ ചുമതല. ഇടിഞ്ഞു പോയ ഭാഗം കരിങ്കല് സംരക്ഷണ ഭിത്തി നിര്മ്മിച്ച് സംരക്ഷിക്കേണ്ടതിന് പകരം അപായ സൂചനമാത്രം നല്കി തടിതപ്പിയിരിക്കുകയാണ് അധികൃതര്.
