പത്തനംതിട്ട : അഴൂര് – പൂങ്കാവ് റോഡിന്റെ സംരക്ഷണ ഭിത്തി ഇടിഞ്ഞ് താഴുന്നത് അപകട ഭീഷണിയാകുന്നു. അഴൂരില് ക്രാഷ് ബാരിയര് സ്ഥാപിച്ചിരിക്കുന്നതിന് സമീപമാണ് ഒരു വശം തിട്ട ഇടിഞ്ഞ് പോകുന്നത്. ക്രാഷ് ബാരിയര് സ്ഥാപിച്ച കാലുകള് താഴ്ചയിലേക്ക് ഇടിഞ്ഞ് പോയ അവസ്ഥയാണ്. റോഡിലെ ഈ ഭാഗത്ത് ഓടയില്ലാത്തതിനാല് മഴ പെയ്യുമ്പോള് വെള്ളം ഈ ഭാഗത്തേക്ക് കുത്തിയൊലിച്ച് ഒഴുകിയാണ് സമീപത്തെ തോട്ടിലേക്ക് ഒഴുകി ഇറങ്ങുന്നത്. ഇതിനാല് തന്നെ ഈ ഭാഗം കൂടുതല് ഇടിയുന്നതിനുള്ള സാധ്യത ഏറെയാണ്. പത്തനംതിട്ടയില് നിന്നും പൂങ്കാവ്, മല്ലശ്ശേരി, വാഴമുട്ടം, താഴൂര്കടവ്, പ്രമാടം എന്നിവിടങ്ങളിലേക്ക് ആളുകള് സഞ്ചരിക്കുന്ന പ്രധാന പാതയിലാണ് അപകടകരമായ ഈ സ്ഥിതിവിശേഷം. കരിങ്കല് കൊണ്ട് നിര്മ്മിച്ച സംരക്ഷണ ഭിത്തി ഇടിഞ്ഞ് പോയിട്ട് കാലങ്ങളേറെയായി. എന്നിട്ടും ഇത് പുനര്നിര്മ്മിക്കാന് നടപടിയായിട്ടില്ല.
ഇടിഞ്ഞ് പോയ ഭാഗം കാടുമൂടി കിടക്കുന്നതിനാല് പെട്ടന്ന് ആരുടേയും ശ്രദ്ധയില്പ്പെടുകയുമില്ല. വാഹനങ്ങള് സൈഡ് കൊടുക്കുമ്പോള് ടയറുകള് ഈ കുഴിയില് വീഴുന്നതിന് സാധ്യത ഏറെയാണ്. പൊതുമാരമത്ത് റോഡ് വിഭാഗത്തിന്റെ പരിധിയില് വരുന്നതാണ് ഈ റോഡ്. മഴ തുടങ്ങിയതോടെ വെള്ളം ഈ ഭാഗത്തുകൂടി ശക്തിയായി സമീപത്തെ തോട്ടിലേക്ക് ഒഴുകിയാല് സംരക്ഷണ ഭിത്തി കൂടുതല് തകര്ച്ചയിലാവും. ഈ വിഷയത്തില് അധികൃതരുടെ അടിയന്തിര ഇടപെടല് ആവശ്യമാണ്.
