മലപ്പുറം: ചുങ്കത്തറയിൽ തെരുവ് നായയെ ബൈക്കിൽ കെട്ടി വലിച്ച സംഭവത്തിൽ പ്രതി അറസ്റ്റിൽ. പൂക്കോട്ടുമണ്ണ സ്വദേശി അബ്ദുൾ കരീമിനെ ആണ് അറസ്റ്റ് ചെയ്തത്. എടക്കര പോലീസാണ് പ്രതിയെ അറസ്റ്റ് ചെയ്തത്. തിങ്കളാഴ്ച രാത്രിയാണ് കേസിനാസ്പദമായ സംഭവം. ഇയാൾ ബൈക്കിനു പിറകിൽ നായയെ കെട്ടി വലിച്ചു കിലോമീറ്ററുകളോളം സഞ്ചരിക്കുകയായിരുന്നു. ബൈക്കിന് പിന്നില് യാത്ര ചെയ്ത യുവാവ് ആണ് ദൃശ്യങ്ങൾ പകര്ത്തി പുറത്തുവിട്ടത്.
നായയെ കെട്ടിവലിച്ച ആളോട് വാഹനം നിര്ത്തണമെന്ന് യുവാവ് ആവശ്യപ്പെട്ടെങ്കിലും ഇയാള് വേഗത്തില് വാഹനം മുന്നോട്ട് കൊണ്ടുപോകുകയായിരുന്നു. പിന്നീട് ബൈക്കിന് മുന്നില് കയറിയ യുവാവ് ഇയാളെ തടയുകയായിരുന്നു. നായയെ കളയുന്നതിനായി കൊണ്ടുപോകുകയാണെന്നാണ് ഇയാള് പറഞ്ഞത്. എന്നാല്, ഇത്തരത്തില് വലിച്ചിഴച്ച് കൊണ്ടുപോകുന്നതിന്റെ ആവശ്യമെന്തായിരുന്നുവെന്ന ചോദ്യത്തിന് ഇയാള് വ്യക്തമായ മറുപടി നൽകിയില്ല. ദൃശ്യങ്ങള് പ്രചരിച്ചതോടെയാണ് പോലീസ് അന്വേഷണം നടത്തി പ്രതിയെ പിടികൂടിയത്. പ്രതിയെ കോടതിയിൽ ഹാജരാക്കും.
