പത്തനംതിട്ട : ഭാവിയില് നാം നടത്തേണ്ട വികസനപ്രവര്ത്തനങ്ങളുടെ കാഴ്ച്ചപ്പാടാണ് നവകേരള സദസ്സിലൂടെ സംസ്ഥാന സര്ക്കാര് മുന്നോട്ട് വെയ്ക്കുന്നത് എന്ന് പുരാവസ്തു – തുറമുഖ മന്ത്രി അഹമ്മദ് ദേവര്കോവില് പറഞ്ഞു. നവകേരള സദസ്സിന്റെ കോന്നി നിയോജക മണ്ഡലത്തിന്റെ വേദിയായ കെഎസ്ആര്ടിസി മൈതാനത്തില് സംസാരിക്കുകയായിരുന്നു മന്ത്രി. രാഷ്ട്രീയത്തിന്റെ അതിര് വരമ്പുകള് ഇല്ലാതെ ജനങ്ങള് നവകേരള സദസ്സുമായി സഹകരിച്ചു കൊണ്ടിരിക്കുകയാണ്. സ്വന്തം അണികളെ തടയാന് പോലും പലര്ക്കും കഴിയുന്നില്ല. കാരണം വാഗ്ദാനങ്ങള് പാലിച്ച് മുന്നോട്ട് പോകുന്ന മന്ത്രിസഭയെ കാണാന് ജനങ്ങള് നേരിട്ട് എത്തുകയാണ്. അസാധ്യമെന്നു കരുതിയ പദ്ധതികള് എല്ലാം സാധ്യമാക്കി.
കേന്ദ്രസര്ക്കാര് പിന്തിരിപ്പന് നടപടികളുമായി എത്തിയിട്ടും അതിനെയെല്ലാം തരണം ചെയ്തു മുന്നോട്ട് പോകുകയാണ് സര്ക്കാര്. കേന്ദ്ര സര്ക്കാരിന്റെ സാമ്പത്തിക നയങ്ങള് കോര്പ്പറേറ്റുകളെ സഹായിക്കുന്നതാണ്. പൊതുമേഖല സ്ഥാപനങ്ങള് വിറ്റ് തുലക്കുന്നു. പുതുതായി തസ്തികകള് സൃഷ്ടിക്കുന്നില്ല. എന്നാല് കേരളത്തില് ആകട്ടെ 26 പൊതുമേഖല സ്ഥാപനങ്ങള് ലാഭത്തില് ആക്കുകയും 40,000 പുതിയ തസ്തികകള് സൃഷ്ടിക്കുകയും ചെയ്തു. സംസ്ഥാനത്തിന്റെ നേട്ടങ്ങളുടെ പട്ടിക വലുതാണെന്നും വികസന രംഗത്ത് സംസ്ഥാനം മാതൃകയാണെന്നും മന്ത്രി പറഞ്ഞു.
