കൊച്ചി: എട്ടാം ക്ലാസ് വിദ്യാര്‍ത്ഥിയെക്കൊണ്ട് തീചാമുണ്ഡി തെയ്യം കെട്ടിച്ച സംഭവത്തില്‍ ഹൈകോടതി കണ്ണൂര്‍ ജില്ല കലക്ടറുടെ റിപ്പോര്‍ട്ട് തേടി. വടക്കന്‍ മലബാര്‍ മേഖലയില്‍ കുട്ടികളെ ഉപയോഗിച്ച് തീചാമുണ്ഡി തെയ്യം നടത്തുന്നത് തടയണമെന്ന് ആവശ്യപ്പെട്ട് മലപ്പുറം കോട്ടക്കലിലെ ദിശയെന്ന സംഘടന നല്‍കിയ ഹര്‍ജിയിലാണ് ചീഫ് ജസ്റ്റിസ് എസ്.വി.എന്‍. ഭട്ടി, ജസ്റ്റിസ് ബസന്ത് ബാലാജി എന്നിവരടങ്ങുന്ന ഡിവിഷന്‍ ബെഞ്ചിന്റെ നിര്‍ദേശം.
കുട്ടി സ്വമേധയാ ആണ് തെയ്യം കെട്ടിയത് എന്ന തരത്തില്‍ പോലീസ് നല്‍കിയ റിപ്പോര്‍ട്ട് പരിഗണിച്ച കോടതി കുട്ടികള്‍ക്കോ രക്ഷിതാക്കള്‍ക്കോ ഇത്തരത്തില്‍ സമ്മതം നല്‍കാനാകില്ലെന്ന് വിലയിരുത്തി അത് തള്ളി. തുടര്‍ന്നാണ് കലക്ടറുടെ റിപ്പോര്‍ട്ട് തേടിയത്. ഏപ്രില്‍ ആറിന് ചിറക്കല്‍ പെരുങ്കളിയാട്ടത്തില്‍ എട്ടാം ക്ലാസ് വിദ്യാര്‍ത്ഥിയെക്കൊണ്ട് തീചാമുണ്ഡി തെയ്യമെന്നും അഗ്‌നിക്കോലമെന്നും അറിയപ്പെടുന്ന തെയ്യം കെട്ടിച്ചിരുന്നു.
