പാലക്കാട്: പട്ടാപ്പകല് വീട്ടില് അതിക്രമിച്ച് കയറി വീട്ടമ്മയെ കെട്ടിയിട്ട് സ്വര്ണം കവര്ന്ന മുഖ്യ പ്രതി അറസ്റ്റില്. മുഹമ്മദ് അജീഷാണ് അറസ്റ്റിലായത്. പാലക്കാട് കല്മണ്ഡപത്ത് വീട്ടമ്മയെ കെട്ടിയിട്ട് 57 പവന് സ്വര്ണവും ഒന്നര ലക്ഷം രൂപയും കവര്ന്ന കേസിലാണ് അറസ്റ്റ്. ഇതോടെ കേസില് അറസ്റ്റിലായവരുടെ എണ്ണം 8 ആയി. കേസില് പാലക്കാട് സ്വദേശികളായ സുരേഷ്, വിജയകുമാര്, റോബിന്, പ്രദീപ് എന്നിവരെ കസബ പോലീസ് നേരത്തെ അറസ്റ്റ് ചെയ്തിരുന്നു.
കഴിഞ്ഞ മാസം 13നാണ് കേസിനാസ്പദമായ സംഭവം നടന്നത്. കല്മണ്ഡപം പ്രതിഭാനഗറില് അന്സാരിയുടെ ഭാര്യ ഷെഫീനയാണ് ആക്രമണത്തിനിരയായത്. വീട്ടില് അതിക്രമിച്ച് കയറിയ സംഘം 57 പവന്റെ സ്വര്ണ്ണാഭരണവും ഒന്നര ലക്ഷം രൂപയുമാണ് കവര്ന്നത്. കവര്ച്ച ചെയ്ത സ്വര്ണ്ണം 18,55,000/ രൂപയ്ക്ക് കോയമ്പത്തൂരിലുളള സേട്ടുവിന് വിറ്റതായി പ്രതികള് സമ്മതിച്ചിട്ടുണ്ട്. സിസിടിവി കേന്ദ്രീകരിച്ചുള്ള ശാസ്ത്രീയമായ രീതിയിലുളള അന്വേഷണത്തിലൂടെയാണ് കേസില് തുമ്പുണ്ടാക്കാന് കഴിഞ്ഞത്.
