തിരുവനന്തപുരം : കേരളത്തിലെ കോൺഗ്രസ് നേതൃത്വത്തിനിടയിലോ സാധാരണ പ്രവർത്തകർക്കിടയിലോ യാതൊരുവിധ തർക്കങ്ങളുമില്ലെന്ന് ടി. സിദ്ധിഖ് എംഎൽഎ വ്യക്തമാക്കി. മുഖ്യമന്ത്രി പദത്തെച്ചൊല്ലിയുള്ള തർക്കങ്ങൾ എന്ന നിലയിൽ പ്രചരിക്കുന്ന വാർത്തകൾ അടിസ്ഥാനരഹിതമാണെന്നും അദ്ദേഹം പറഞ്ഞു. കെ.സി. വേണുഗോപാൽ, വി.ഡി. സതീശൻ, രമേശ് ചെന്നിത്തല എന്നിവരാരും തനിക്ക് മുഖ്യമന്ത്രി പദം വേണമെന്നോ മറ്റുള്ളവർ മാറിനിൽക്കണമെന്നോ പരസ്യമായി ആവശ്യപ്പെട്ടിട്ടില്ലെന്ന് സിദ്ധിഖ് ചൂണ്ടിക്കാട്ടി. ഇത്തരം കാര്യങ്ങളിൽ വളരെ ശാന്തമായും കൃത്യതയോടുകൂടിയും തീരുമാനമെടുക്കാൻ കോൺഗ്രസ് ഹൈക്കമാൻഡിന് കപ്പാസിറ്റിയും സ്ട്രെങ്ത്തുമുണ്ടെന്നും അദ്ദേഹം അഭിപ്രായപ്പെട്ടു.
പാർട്ടിക്കുള്ളിൽ തർക്കങ്ങൾ ഉണ്ടാകണമെന്ന് ആഗ്രഹിക്കുന്നത് സി.പി.എം അടക്കമുള്ള രാഷ്ട്രീയ എതിരാളികളാണെന്നും എന്നാൽ പ്രവർത്തകർക്കിടയിൽ അത്തരം ഭിന്നതകളില്ലെന്നും അദ്ദേഹം വ്യക്തമാക്കി. നിലവിൽ പാർട്ടി ഏൽപ്പിച്ച എംഎൽഎ എന്ന ദൗത്യം ഉത്തരവാദിത്തത്തോടെയാണ് താൻ നിർവഹിക്കുന്നത്. മന്ത്രിസ്ഥാനം സംബന്ധിച്ച ചർച്ചകളൊന്നും ഇതുവരെ നടന്നിട്ടില്ലെന്നും ഹൈക്കമാൻഡ് നിർദ്ദേശിക്കുന്ന സമയത്ത് കൃത്യമായ തീരുമാനങ്ങൾ ഉണ്ടാകുമെന്നും ടി. സിദ്ധിഖ് മാധ്യമങ്ങളോട് പ്രതികരിച്ചു.
