കോന്നി : ദിവസവും നിരവധി രോഗികൾ എത്തിച്ചേരുന്ന കോന്നി താലൂക്ക് ആശുപത്രിപരിസരത്തെ വെളിച്ചക്കുറവ് രോഗികളെ വലയ്ക്കുന്നു. താലൂക്ക് ആശുപത്രിയിലേക്ക് കയറുന്ന വഴിയിൽ ഇലക്ട്രിക് പോസ്റ്റിലെ മങ്ങിയ വെളിച്ചം മാത്രമാണ് ഉള്ളത്. ആശുപത്രിയിൽ കെട്ടിടനിർമ്മാണ പ്രവർത്തനങ്ങൾ നടക്കുന്നതിനാൽ ലാബ് അത്യാഹിത വിഭാഗത്തിന് മുകളിലത്തെ കെട്ടിടത്തിൽ ആണ് പ്രവർത്തിക്കുന്നത്. ഈ കെട്ടിടത്തിലേക്കും ഇതിന് മുകളിലത്തെ കെട്ടിടത്തിൽ പ്രവർത്തിക്കുന്ന വാർഡിലേക്കും കയറി പോകണം എങ്കിൽ കയ്യിൽ വെളിച്ചം കരുതാതെ കഴിയില്ല. വാഹനാപകടങ്ങൾ അടക്കം കൂടുതലും രാത്രിയിലാണ് കോന്നിയിൽ നടക്കുന്നത്. ഇതിനാൽ തന്നെ ലാബ് ടെസ്റ്റുകൾ അടക്കം ഇവിടെ ചെയ്യേണ്ടി വരുന്നുണ്ട്.
സ്ത്രീകൾ അടക്കം ഈ ഇരുട്ടിൽ കൂടി വേണം പരിശോധനകൾക്കായി ലാബിലേക്കും വാർഡിലേക്കും എത്തുവാൻ. വെളിച്ചം കുറവുള്ളതിനാൽ തെരുവ് നായ ശല്യവുമുണ്ട്. കോന്നിയിലെ മലയോര മേഖലയിലെ ജനങ്ങൾ ഏറെയും ആശ്രയിക്കുന്ന പ്രധാന ആശുപത്രിയാണ് കോന്നി താലൂക്ക് ആശുപത്രി. എന്നിട്ടും സ്ഥലത്ത് ആവശ്യത്തിനുള്ള വെളിച്ചം നൽകുവാൻ അധികൃതർക്ക് കഴിഞ്ഞിട്ടില്ല. ഇവിടെ പലയിടത്തും നിരീക്ഷണ ക്യാമറകൾ അടക്കം സ്ഥാപിക്കേണ്ടതുമുണ്ട്. ജില്ലയുടെ വിവിധ ഇടങ്ങളിൽ ആവശ്യത്തിനും ആനാവശ്യത്തിനും ഹൈമാസ്റ്റ് ലൈറ്റുകൾ സ്റ്റാപിക്കുന്ന ജനപ്രതിനിധികൾ കോന്നി താലൂക്ക് ആശുപത്രി പരിസരം ഇരുട്ടിലായത് കണ്ടിട്ടും കണ്ണടക്കുന്നതിൽ പ്രതിഷേധത്തിലാണ് ജനങ്ങൾ.
