തിരുവനന്തപുരം : ജില്ലയിലെ സാഹചര്യം അതീവ ഗുരുതരമാണെന്നും നിയന്ത്രണങ്ങള് കൃത്യമായി പാലിച്ചില്ലെങ്കില് വീണ്ടും ലോക്ഡൗണ് വേണ്ടിവരുമെന്ന മുന്നറിയിപ്പുമായി മേയര് കെ ശ്രീകുമാര്. രോഗികളുടെ എണ്ണം ഒരാഴ്ചക്കിടെ ആറായിരം കടന്ന സാഹചര്യത്തിലാണ് മുന്നറിയിപ്പുമായി നഗരസഭ രംഗത്തെത്തിയത്.
സംസ്ഥാനത്ത് ആദ്യമായി ഒരു ദിവസം രോഗികളുടെ എണ്ണം ആയിരം കടന്നത് തിരുവനന്തപുരം ജില്ലയിലാണ്. ഒരാഴ്ചക്കിടെ 6550 പേര്ക്കാണ് ജില്ലയില് കൊവിഡ് സ്ഥിരീകരിച്ചത്. സംസ്ഥാനത്ത് ഇതുവരെ സ്ഥിരീകരിച്ച കൊവിഡ് മരണങ്ങളില് 30 ശതമാനവും തലസ്ഥാന ജില്ലയിലാണ്. ലോക്ഡൗണ് ഇളവുകള് വന്നതോടെ ഭയമോ ജാഗ്രതയോ ഇല്ലാതെ ആളുകള് പുറത്തിറങ്ങി പെരുമാറുന്നത് വലിയ പ്രതിസന്ധി ഉണ്ടാക്കുന്നുവെന്ന് തിരുവനന്തപുരം മേയര് പറഞ്ഞു.
വീട്ടില് നിരീക്ഷത്തിലുള്ളവരെ കൃത്യമായി നിരീക്ഷിക്കുന്നതിനുള്പ്പടെയുള്ള നടപടിയെടുക്കുമെന്നും മേയര് വ്യക്തമാക്കി. രോഗികളുടെ എണ്ണാം പതിനായിരത്തോടടുക്കുമ്ബോള് നിലവില് 45 ശതമാനം രോഗികളും വീടുകളിലാണുള്ളത്. ആരോഗ്യ പ്രശ്നങ്ങള് ഉള്ളവരെ മാത്രം രോഗതീവ്രത അനുസരിച്ച് കൊവിഡ് കേന്ദ്രങ്ങളിലേക്കോ ആശുപത്രികളിലേക്കോ മാറ്റുക എന്നതാണ് രോഗവ്യാപനം മൂര്ച്ഛിക്കുന്ന ഘട്ടത്തില് ആരോഗ്യ വകുപ്പ് സ്വീകരിക്കുന്ന നയം. ആവശ്യത്തിന് ആരോഗ്യ പ്രവര്ത്തകരില്ലാതിരിക്കുകയും ആശുപത്രികളും കൊവിഡ് സെന്ററുകളും നിറയുകയും ചെയ്യുന്ന സാഹചര്യത്തില് ജില്ലയിലെ സ്ഥിതി കൂടുതല് പ്രതിസന്ധിയിലേക്ക് പോവുകയാണ്.
അതേസമയം സംസ്ഥാനത്ത് കോവിഡ് രോഗികളുടെ എണ്ണം കുതിച്ചുയരുന്ന സാഹചര്യത്തില് നിയന്ത്രണങ്ങള് കടുപ്പിക്കുന്നത് സംബന്ധിച്ച് ഇന്ന് തീരുമാനമുണ്ടാകും. മുഖ്യമന്ത്രിയുടെ അധ്യക്ഷതയില് ഇന്ന് നിര്ണായക യോഗം ചേരും. ഇന്ന് ചേരുന്ന ഉന്നതതല യോഗം സ്ഥിതിഗതികള് വിലയിരുത്തും. ലോക്ഡൗണ് വേണ്ടെന്നാണ് പൊതു നിലപാട്. എന്നാല് കോവിഡ് വ്യാപനം കൂടുതലുള്ള മേഖലകളില് ലോക്ഡൗണിനു സമാനമായ നിയന്ത്രണങ്ങള് കടുപ്പിക്കാനായിരിക്കും തീരുമാനം.
