തിരുവനന്തപുരം: നിയന്ത്രണം വിട്ട കാര് കലുങ്കിലിടിച്ച് നാലു പേര് മരിച്ചു. കഴക്കൂട്ടം സ്വദേശികളായ ലാല്, നിജീബ്, വെഞ്ഞാറമൂട് സ്വദേശികളായ ഷമീര് സുല്ഫി എന്നിവരാണ് മരിച്ചത്. ചികിത്സയില് കഴിയുന്ന വെഞ്ഞാറമൂട് സ്വദേശിയായ നിവാസ് അപകടനില തരണം ചെയ്തിട്ടില്ല. കിളിമാനൂരില് പുലര്ച്ചെ രണ്ട് മണിയോടെയാണ് അപകടമുണ്ടായത്.
പരിക്കേറ്റ ഒരാള് കിളിമാനൂര് ഗോഗുലം മെഡിക്കല് കോളേജില് ചികിത്സയിലാണ്. സുഹൃത്തിന്റെ വീട്ടില് പോയി മടങ്ങുകയായിരുന്നു കാറിലുണ്ടായിരുന്നവര്. കിളിമാനൂരിനടുത്ത് കാരേറ്റ് എന്നസ്ഥലത്താണ് അപകടം നടന്നത്. ഡ്രൈവര് ഉറങ്ങിപ്പോയതാകാം മരണകാരണം എന്നാണ് പ്രാഥമിക നിഗമനം. കാറിന്റെ മുന് ഭാഗം പൂര്ണമായി തകര്ന്ന നിലയിലാണ്. പ്രദേശവാസികളും റോഡിലൂടെ പോയ മറ്റു യാത്രക്കാരുമാണ് രക്ഷാപ്രവര്ത്തനങ്ങള് നടത്തിയത്.
