തിരുവനന്തപുരം : ചോദ്യങ്ങള്‍ ചോദിക്കുന്നതിന്റെ പേരില്‍ മാധ്യമപ്രവര്‍ത്തകരെ സര്‍ക്കാരും സി.പി.എമ്മും കടന്നാക്രമിക്കുന്നുവെന്ന് തിരുവഞ്ചൂര്‍ രാധാകൃഷ്ണന്‍. വി.ഡി സതീശന്‍ കൊണ്ടുവന്ന അവിശ്വാസ പ്രമേയത്തെ പിന്തുണച്ച് സംസാരിക്കുകയായിരുന്നു അദ്ദേഹം. മുഖ്യമന്ത്രിയുടെ പ്രസ് സെക്രട്ടറിയാണ് എല്ലാത്തിനും നേതൃത്വം നല്‍കുന്നത്. പ്രസ് സെക്രട്ടറിയുടെ ശമ്പളം ഖജനാവില്‍ നിന്നാണ് നല്‍കുന്നതെന്ന് ഓര്‍മ്മ വേണം.
വനിതാ മാധ്യമപ്രവര്‍ത്തകര്‍ക്കെതിരെ അദ്ദേഹം നടത്തിയ പരാമര്‍ശം പറയാന്‍ പോലും തനിക്ക് കഴിയില്ല. ഇതെന്താ പ്രതികാരം തീര്‍ക്കുന്ന സര്‍ക്കാരാണോയെന്നും തിരുവഞ്ചൂര്‍ വിമര്‍ശിച്ചു. സര്‍ക്കാര്‍ അധികാരത്തില്‍ കയറി ആദ്യ ദിവസങ്ങളില്‍ തന്നെ മുഖ്യമന്ത്രി അവതാരങ്ങളെ കുറിച്ച് മുന്നറിയിപ്പ് നല്‍കി. എന്നാല്‍ സര്‍ക്കാരിനെ നിയന്ത്രിക്കുന്ന പതിനഞ്ചോളം അവതാരങ്ങളുടെ പേര് തന്റെ പക്കലുണ്ടെന്ന് തിരുവഞ്ചൂര്‍ പറഞ്ഞു.
