ഇരവിപേരൂർ: തിരുവല്ലാ ഈസ്റ്റ് കോ-ഓപ്പറേറ്റീവ് ബാങ്ക് പ്രസിഡന്റായി പ്രൊഫ.ഡോ.ജേക്കബ് ജോർജ്ജ് തെരഞ്ഞെടുത്തു. സഹകരണ ഇലക്ഷൻ കമ്മീഷൻ നിയമിച്ച പ്രിസൈഡിംഗ് ഓഫീസർ അസിസ്റ്റന്റ് രജിസ്ട്രാർ അനിൽ.കെ അദ്ധ്യക്ഷത വഹിച്ചു. അദ്ദേഹംചെങ്ങന്നൂര് ക്രിസ്ത്യൻ കോളജ് മുൻ പ്രിൻസിപ്പലാണ്. മല്ലപ്പള്ളി സർക്കിൾ സഹകരണ യൂണിയൻ ചെയർമാൻ, സി.പി.ഐ.(എം) മല്ലപ്പള്ളി ഏരിയ കമ്മറ്റി അംഗം എന്നീ നിലകളിൽ പ്രവർത്തിക്കുന്നു.
മല്ലപ്പള്ളി സർവ്വീസ് സഹകരണ ബാങ്ക് പ്രസിഡന്റ്, മല്ലപ്പള്ളി ബ്ലോക്ക് പഞ്ചായത്ത് പ്രസിഡന്റ്, മാർത്തോമ്മാ സഭാ ട്രസ്റ്റി എന്നീ നിലകളിൽ പ്രവർത്തിച്ചിട്ടുണ്ട്. ഞായറാഴ്ച നടന്ന തെരഞ്ഞെടുപ്പിൽ എൽ.ഡി.എഫ് സഹകരണ സംരക്ഷണ മുന്നണി മുഴുവൻ സീറ്റിലും വിജയിച്ചിരുന്നു. പ്രസിഡന്റ് തെരഞ്ഞെടുപ്പിനു ശേഷം നടന്ന അനുമോദന സമ്മേളനം തിരുവല്ലാ സർക്കിൾ സഹകരണ യൂണിയൻ ചെയർമാൻ അഡ്വ.ആർ.സനൽകുമാർ ഉദ്ഘാടനംചെയ്തു. ബാങ്ക് അഡ്മിനിസ്റ്റേർ എം.പി ഹിരൺ അദ്ധ്യക്ഷനായിരുന്നു.
കൺസ്യൂമർ ഫെഡറേഷൻ ഡയറക്ടർ ജി.അജയകുമാർ, ഇരവിപേരൂർ സർവ്വീസ് സഹകരണ ബാങ്ക് ഡയറക്ടർ സുരേഷ് കുമാർ, മല്ലപ്പള്ളി അസിസ്റ്റന്റ് രജിസ്ട്രാർ അഭിലാഷ് പി.ആർ, ഭരണ സമിതി അംഗങ്ങളായ ജിജി മാത്യു, വി.കെ ശ്രീധരൻപിള്ള, ഡോ.അംബികാദേവി ജഗദീഷ്, സി.ഇ.ഒ കെ.എൻ അമ്മിണിക്കുട്ടി, ജനറൽ മാനേജർ പി.ജി സന്തോഷ് കുമാർ, എംപ്ലോയീസ് യൂണിയൻ ജില്ലാ ജോയിന്റ് സെക്രട്ടറി കെ.ജി രാജേന്ദ്രൻ നായർ, എംപ്ലോയീസ് ഫ്രണ്ട് യൂണിറ്റ് പ്രസിഡന്റ് കെ.ആർ പ്രതീഷ്, ജീവനക്കാരുടെ പ്രതിനിധി ഇ.എ ഏബ്രഹാം എന്നിവർ സംസാരിച്ചു.
1953 ൽ ആരംഭിച്ച ഈസ്റ്റ് കോ – ഓപ്പറേറ്റീവ് ബാങ്കിന് 12 പഞ്ചായത്തുകളിലായി ഇപ്പോൾ 18 ശാഖകൾ പ്രവർത്തിക്കുന്നു. അഴിമതി രഹിതമായി ബാങ്കിന്റെ വിപുലീകരണത്തിനായി പ്രവർത്തിക്കുമെന്നും സാധാരണ ഓഹരി ഉടമകളുടെയും റിട്ടയാർ ചെയ്തവർ ഉൾപ്പെടെയുള്ള ജീവനക്കാരുടെയും പ്രശ്നണൾ പരിഹരിക്കുന്നതിന് മുന്തിയ പരിഗണന നൽകുമെന്നും പ്രസിഡന്റ് പറഞ്ഞു.
