ന്യൂഡല്ഹി: ഇന്ത്യയുടെ വളര്ച്ചയില് മുഖ്യപങ്കുവഹിക്കുക പണം ചെലവാക്കാന് ശേഷിയുള്ള മിഡില് ക്ലാസ് വിഭാഗമെന്ന് ധനമന്ത്രി നിര്മലസീതാരാമന്. രാജ്യത്തിന്റെ ചിലവിന്റെ 93 ശതമാനവും നിര്വഹിക്കുക ഈ മിഡില് ക്ലാസാണെന്നും നിര്മല സീതാരാമന് പറഞ്ഞു. ഭൂമിശാസ്ത്രപരമായും വികസനത്തില് മാറ്റമുണ്ടാകുന്നുണ്ട്. വളര്ച്ച 500 നഗരങ്ങളില് കേന്ദ്രീകരിക്കുമെന്നും നിര്മല സീതാരാമന് പറഞ്ഞു. പുതുതായി ഉയര്ന്നു വരുന്ന നഗരങ്ങളിലാണ് വളര്ച്ച. ഇന്ത്യന് മിഡില്ക്ലാസ് മുംബൈ, ഡല്ഹി, ബംഗളൂരു, ചെന്നൈ നഗരങ്ങളില് മാത്രം കേന്ദ്രീകരിക്കുന്നില്ലെന്നും നിര്മല സീതാരാമന് പറഞ്ഞു. ടു ടയര്, ത്രീ ടയര് നഗരങ്ങളിലും ശക്തമായ മിഡില് ക്ലാസ് സാന്നിധ്യമുണ്ട്. അതുകൊണ്ട് സമ്പത്ത് മെട്രോപൊളിറ്റന് നഗരങ്ങളില് മാത്രം കേന്ദ്രീകരിക്കുന്നില്ല.
മിഡില് ക്ലാസ് വളര്ച്ചയുടെ ഗുണഭോക്താക്കള് മാത്രമല്ല. അവര് വളര്ച്ചക്ക് വലിയ സംഭാവന നല്കുന്നു. ഇന്ന് ഇന്ത്യന് ജനസംഖ്യയില് 31 ശതമാനവും മിഡില് ക്ലാസാണ്. 1995 മുതല് മിഡില് ക്ലാസ് വിഭാഗത്തില് 6.3 ശതമാനം വളര്ച്ചയുണ്ടാകുന്നുണ്ടെന്നും നിര്മല സീതാരാമന് പറഞ്ഞു. 2030നും 2035നും ഇടയില് മിഡില് ക്ലാസിന്റെ എണ്ണത്തില് ഇന്ത്യ ചൈനയെ മറികടക്കും. കേന്ദ്രസര്ക്കാര് നടപ്പാക്കിയ നടപടികള് താഴ്ന്ന വരുമാനക്കാരെ മിഡില് ക്ലാസിലേക്ക് ഉയരാന് സഹായിച്ചു. ജന്ധന് അക്കൗണ്ടുകളും ജിഎസ്ടി ഇളവും താഴ്ന്ന വരുമാനക്കാരെ വലിയ രീതിയില് സഹായിച്ചുവെന്നും നിര്മല സീതാരാമന് പറഞ്ഞു.
