കോട്ടക്കൽ: പ്രശസ്ത കാരിക്കേച്ചർ കലാകാരനും കേരള കാർട്ടൂൺ അക്കാദമി സെക്രട്ടറിയുമായ തോമസ് ആന്റണി (62) അന്തരിച്ചു. ഹൃദയാഘാതത്തെ തുടർന്ന് ഞായറാഴ്ച പുലർച്ചെ നാലുമണക്ക് കോട്ടക്കലിൽ വെച്ചായിരുന്നു അന്ത്യം. ചിത്രകലാ പരിഷത്ത് നടത്തുന്ന ചിത്രകാരന്മാരുടെ ക്യാമ്പിൽ പങ്കെടുക്കാൻ മലപ്പുറത്ത്‌ പോയതായിരുന്നു അദ്ദേഹം. കോട്ടയം സ്വദേശിയാണ്.
മലപ്പുറത്ത്‌ വെച്ച് രാത്രിയിൽ അദ്ദേഹത്തിന് ദേഹാസ്വാസ്ഥ്യം അനുഭവപ്പെടുകയായിരുന്നു. തുടർന്ന് ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. മെട്രോ വാര്‍ത്ത എക്‌സിക്യൂട്ടീവ് ആർട്ടിസ്റ്റായിരുന്നു. ദീർഘകാലം ദീപിക പത്രത്തിൽ സേവനമനുഷ്ഠിച്ചു. തോമസ് ആന്റണിയുടെ വിയോഗത്തില്‍ കേരള കാർട്ടൂൺ അക്കാദമി അഗാധമായ ദു:ഖം രേഖപ്പെടുത്തി.
