തിരുവനന്തപുരം : സംസ്ഥാന സര്ക്കാരും ഗവര്ണര് ആരിഫ് മുഹമ്മദ് ഖാനും തമ്മിലുള്ള പോര് തുടരുന്നതിനിടെ ഗവര്ണര്ക്കെതിരെ രൂക്ഷ വിമര്ശനവുമായി സിപിഎം സംസ്ഥാന സെക്രട്ടറിയേറ്റ് അംഗം തോമസ് ഐസക്. അനുനയത്തിന് എത്ര ശ്രമിച്ചിട്ടും വഴങ്ങില്ലെന്ന ശാഠ്യത്തിലാണ് ഗവര്ണര്. പദവിയുടെ മാന്യത വിട്ട് ഒരു വൈസ് ചാന്സലറെ ക്രിമിനലെന്നും മറ്റും വിളിക്കുന്നതിലേക്ക് എത്തിയിരിക്കുകയാണ് കാര്യങ്ങളെന്നും ഐസക് പറഞ്ഞു. ഫെയ്സ്ബുക്കിലൂടെയാണ് അദ്ദേഹത്തിന്റെ പ്രതികരണം.
‘ഗവര്ണ്ണര് പദവി എന്നും വിവാദമായിട്ടുണ്ട്. പക്ഷേ, ഇന്നത്തേതുപോലെ ഒരു സ്ഥിതിവിശേഷം കേരളത്തില് മുമ്ബ് ഉണ്ടായിട്ടില്ല. കേരള സര്ക്കാര് അനുനയിപ്പിക്കുന്നതിന് എത്ര ശ്രമിച്ചാലും വഴങ്ങില്ലായെന്ന ശാഠ്യത്തിലാണ് കേരള ഗവര്ണര് ആരിഫ് ഖാന്. അത് ഇപ്പോള് ഗവര്ണര് പദവിയുടെ മാന്യത വിട്ട് ഒരു വൈസ് ചാന്സലറെ ക്രിമിനലെന്നും മറ്റും വിളിക്കുന്നതിലേക്ക് എത്തിയിരിക്കുകയാണ്.
ഗവര്ണര് മനസിലാക്കേണ്ടുന്ന ഒരു വസ്തുതയുണ്ട്. വളരെ ആദരണീയനായ ഒരു ചരിത്ര പണ്ഡിതനാണ് പ്രൊഫ.ഗോപിനാഥ് രവീന്ദ്രന്. ബിജെപിയുടെ കീഴില് എല്ലാ അക്കാദമിക് മാനദണ്ഡങ്ങളും കാറ്റില്പ്പറത്തി എല്ലാ അക്കാദമിക് വേദികളിലും ആര്എസ്എസ് ശിങ്കിടികളെ നിയമിക്കുന്നതിനുള്ള നീക്കങ്ങളാണ് നടത്തിക്കൊണ്ടിരിക്കുന്നത്. ജവഹര്ലാല് നെഹ്റു സര്വ്വകലാശാല അടക്കമുള്ള കേന്ദ്ര സര്വ്വകലാശാലകളിലെ സംഭവവികാസങ്ങള് ആരുടെയും കണ്ണു തുറപ്പിക്കേണ്ടതാണ്. കേരളത്തിലെ സര്വ്വകലാശാലകളെ ഗവര്ണറെ ഉപയോഗപ്പെടുത്തി അതുപോലെ അധപതിപ്പിക്കുവാന് അനുവദിക്കില്ല’ – ഐസക് വ്യക്തമാക്കി.
