റാന്നി: നവരാത്രി ആഘോഷങ്ങളുടെ ഭാഗമായി റാന്നി-തോട്ടമൺകാവ് ദേവീക്ഷേത്രത്തിൽ ദേവീഭാഗവത നവാഹ ജ്ഞാനയജ്ഞം സമാരംഭിച്ചു. ഐശ്വര്യം അഥവാ ഭക്തിയോടൊപ്പം മുക്തിയും പ്രദാനം ചെയ്യുന്നതാണ് ദേവീഭാഗവതമെന്നും ഇഹലോകത്തിൽ അഭിവൃദ്ധി ലഭിക്കുന്നതിനു പുറമേ പരലോകത്തിൽ മോക്ഷവും ആണ് പരായണത്തിൻ്റെ ഫലശ്രുതിയെന്നും യജ്ഞാചാര്യൻ പാവുമ്പ കൊയ്പ്പള്ളിൽ ശശിധരൻ സ്വാമികൾ മഹാത്മ്യ പ്രഭാഷണത്തിൽ പറഞ്ഞു.
യജ്ഞശാലയിലെ വിഗ്രഹപ്രതിഷ്ഠയക്കു മുമ്പിൽ ക്ഷേത്ര കീഴ്ശാന്തി ജിഷ്ണു ശർമ്മ യജ്ഞ ദീപ പ്രകാശനം നടത്തി. ദേവസ്വം പ്രസിഡൻ്റ് ജി.ഹരികുമാർ അദ്ധ്യക്ഷത വഹിച്ചു. യജ്ഞാചാര്യനെയും യജ്ഞ പൗരാണികരെയും ദേവസ്വം ഭാരവാഹികൾ ചേർന്നു സ്വീകരിച്ചു. തലവൂർ ഹരി നമ്പൂതിരിയാണ് യജ്ഞ ഹോതാവ്. നെല്ലിമുകൾ ഹരികുമാർ, കടമ്മനിട്ട ജയകുമാർ, പാവുമ്പ മോഹൻജി എന്നിവർ യജ്ഞ പൗരാണികരും. നവാഹം ഒക്ടോബർ 4ന് അവഭൃത സ്നാനത്തോടെ സമാപിക്കും. തുടർന്ന് നവരാത്രി വിജയദശമി ആഘോഷങ്ങളും നടക്കും.
