മലപ്പുറം : പീഡനത്തിന് ഇരയായ പെണ്കുട്ടിയെ പ്രതി ഭീഷണിപ്പെടുത്തുന്നുവെന്ന പരാതിയുമായി പിതാവ്. ചട്ടിപ്പറമ്പ് സ്വദേശി ഫിറോസിനെതിരെയാണ് പിതാവ് പരാതിയുമായി ജില്ലാ പോലീസ് മേധാവിയെ സമീപിച്ചത്. ഭീഷണിയില് ഭയന്ന് കുട്ടി സ്കൂളിലോ, മദ്രസയിലോ പോകുന്നില്ലെന്നും പിതാവ് പറയുന്നു. 13 കാരിയായ പെണ്കുട്ടിയുടെ പിതാവാണ് പരാതിയുമായി രംഗത്ത് വന്നിരിക്കുന്നത്. ഓട്ടോ ഡ്രൈവര് കൂടിയായ ഫിറോസ് കഴിഞ്ഞ വര്ഷം ഡിസംബറിലാണ് കുട്ടിയെ പീഡിപ്പിച്ചത്. പിതാവിന്റെ പരാതിയില് കൊളത്തൂര് പോലീസ് ഫിറോസിനെ അറസ്റ്റ് ചെയ്തിരുന്നു.
തുടര്ന്ന് ജില്ലയില് പ്രവേശിക്കരുതെന്ന ഉപാധിയില് ഫിറോസിന് കോടതി ജാമ്യം അനുവദിച്ചു. എന്നാല് ഇത് ലംഘിച്ച് ഫിറോസ് ജില്ലയില് എത്തുകയായിരുന്നു. തുടര്ന്ന് കുട്ടിയുടെ പിതാവ് ജില്ലാ കളക്ടര്ക്ക് പരാതി നല്കി. ഇതറിഞ്ഞ പ്രതി സ്കൂള്വിട്ട് വീട്ടിലേക്ക് വരികയായിരുന്ന പെണ്കുട്ടിയെ കൊന്നുകളയുമെന്ന് ഭീഷണിപ്പെടുത്തുകയായിരുന്നു. തുടര്ന്ന് കൊളത്തൂര് പോലീസില് പരാതി നല്കിയെങ്കിലും നടപടി ഉണ്ടായില്ല. തുടര്ന്നാണ് ജില്ലാ പോലീസ് മേധാവിയ്ക്ക് പരാതി നല്കിയത്.
