മടിവാള: ബെംഗളുരു മടിവാളയിൽ സിനിമാ തീയറ്ററിന്റെ ശുചിമുറിയിൽ മൊബൈൽ ഫോൺ ഉപയോഗിച്ച് നഗ്നദൃശ്യങ്ങൾ പകർത്തിയ കേസിൽ തീയേറ്റർ ജീവനക്കാരൻ ഉൾപ്പെടെ മൂന്നുപേർ പിടിയിൽ. പിടിയിലായവരിൽ പ്രായപൂർത്തിയാകാത്ത ഒരു ആൺകുട്ടിയും ഉണ്ട്. തീയേറ്റർ മാനേജ്മെന്റിനെതിരെയും പൊലീസ് കേസെടുത്തിട്ടുണ്ട്. മടിവാളയിലെ സന്ധ്യ തിയേറ്ററിൽ ഇന്നലെ വൈകിട്ട് സിനിമ കാണാൻ എത്തിയ ടെക്കിയായ യുവതിയും കൂട്ടുകാരികളും നൽകിയ പരാതിയിലാണ് പോലീസ് കേസെടുത്തത്.
ജീവനക്കാരനായ രാജേഷ്, ഇയാളുടെ സുഹൃത്ത് കമൽ, പ്രായപൂർത്തിയാകാത്ത ഒരു കുട്ടി, തീയേറ്റർ മാനേജ്മെന്റ് എന്നിവരെ പ്രതി ചേർത്താണ് പോലീസ് കേസ് എടുത്തിട്ടുള്ളത്. സിനിമയുടെ ഇന്റർവെൽസമയത്ത് യുവതിയും കൂട്ടുകാരികളും ശുചിമുറി ഉപയോഗിക്കാനായി ചെന്നപ്പോൾ ആൺകുട്ടി അവിടെ ഉണ്ടായിരുന്നുവെന്നും കൈവശമുള്ള മൊബൈൽ ഫോൺ ഉപയോഗിച്ച് ദൃശ്യങ്ങൾ പകർത്തി എന്നുമാണ് പരാതി. സംഭവം ശ്രദ്ധയിൽപ്പെട്ടതോടെ ഇവർ ബഹളമുണ്ടാക്കുകയും തീയേറ്റർ ജീവനക്കാരെ വിവരമറിയിക്കുകയുമായിരുന്നു.
