തൃശൂര്: തൃശൂരില് ബസില് സ്കൂൾ വിദ്യാര്ത്ഥിനികള്ക്ക് മുന്നില് നഗ്നതാ പ്രദര്ശനം നടത്തിയ യുവാവിന് കഠിന തടവും പിഴയും ശിക്ഷ. തൃശൂര് പുത്തന്ചിറ സ്വദേശി ആലപ്പാട്ട് വീട്ടില് വര്ഗീസിനെയാണ് (27) പോക്സോ ആക്ട് പ്രകാരം കേസെടുത്ത് ശിക്ഷ വിധിച്ചത്. ഒരു വര്ഷം കഠിന തടവും 10,000 രൂപ പിഴയ്ക്കുമാണ് ശിക്ഷിച്ചത്. 2019 നവംബര് മാസത്തിലാണ് കേസിനാസ്പദമായ സംഭവമുണ്ടായത്.
സ്കൂള് വിട്ട് കൊടുങ്ങല്ലൂര് റൂട്ടിലുള്ള ബസില് വരികയായിരുന്ന ഒമ്പതും പതിനൊന്നും വയസുള്ള കുട്ടികള്ക്ക് മുന്നിലാണ് പ്രതി നഗ്നതാ പ്രദര്ശനം നടത്തിയത്. തുടര്ന്ന് കൊടുങ്ങലൂര് കാര ജംഗ്ഷനില് ഇറങ്ങിയ കുട്ടികളെ, മിഠായി വാങ്ങി തരാമെന്ന് പറഞ്ഞ് പ്രതി പിന്തുടര്ന്നു. ഭയന്ന കുട്ടികള് അടുത്ത വീട്ടിലേക്കു ഓടി ചെന്ന് വിവരം അറിയിച്ചു. തുടര്ന്ന് നാട്ടുകള് പ്രതിയെ തടഞ്ഞുവെച്ചു. കൊടുങ്ങല്ലൂര് പോലീസാണ് കേസ് രജിസ്റ്റര് ചെയ്തു അന്വേക്ഷണം നടത്തിയത്.
