മൂന്നാര്: ജലവിതരണ വകുപ്പിന്റെ ലക്ഷങ്ങള് വിലയുള്ള ഇരുമ്പ് പൈപ്പുകള് കാണാതായി. ദേശീയ പാതയില് പഴയ മൂന്നാര് ബൈപ്പാസ് പാലം മുതല് സിഗ്നല് പോയിന്റ് വരെയുള്ള ദേശീയ പാതയോരത്ത് സൂക്ഷിച്ചിരുന്ന ഇരുമ്പു പൈപ്പുകളാണ് നഷ്ടപ്പെട്ടത്. ഓരോ പൈപ്പും 450 കിലോയിലധികം തൂക്കമുള്ളവയാണ്. ഉപേക്ഷിച്ച ശുദ്ധജല വിതരണ പദ്ധതിയുടെ പൈപ്പുകളാണിവ. 16 ടണ്ണിലധികം തൂക്കമുള്ള ഇവ ലക്ഷങ്ങള് വിലമതിക്കുന്നവയാണ്.
കൊച്ചി-ധനുഷ് കോടി ദേശീയപാതയുടെ നവീകരണ പ്രവര്ത്തനങ്ങള്ക്കിടയില് മണ്ണിനടിയില് നിന്നും നീക്കം ചെയ്ത 36 കൂറ്റന് ശുദ്ധജല പൈപ്പുകളാണ് കഴിഞ്ഞ ദിവസം രാത്രിയില് മോഷണം പോയത്. പിന്നീട് ഇവ കുഞ്ചിത്തണ്ണിയിലെ ഒരു വീട്ടില് സൂക്ഷിച്ച നിലയില് നാട്ടുകാര് കണ്ടെത്തിയെങ്കിലും അന്നു രാത്രി തന്നെ ലോറിയില് ആക്രി വ്യാപാരികള് തമിഴ്നാട്ടിലേക്ക് കടത്തുകയായിരുന്നു. ജലവിതരണ വകുപ്പിലെ താല്ക്കാലിക ജീവനക്കാരന്റെ നേതൃത്വത്തിലാണ് സംശയം തോന്നാത്ത വിധത്തില് ഇവ കഴിഞ്ഞ ദിവസം രാത്രിയില് യന്ത്രസഹായത്തോടെ ലോറിയില് കയറ്റി കുഞ്ചിത്തണ്ണിയിലെ വീട്ടിലെത്തിച്ചതെന്നാണ് ആരോപണം.
