നിലയ്ക്കൽ : ശബരിമല തീർത്ഥാടന പാതയിലെ പ്രധാന ഇടത്താവളമായ നിലയ്ക്കലിൽ പുലിയിറങ്ങി. നിലയ്ക്കലിലെ പെട്രോൾ പമ്പിലെത്തിയ പുലി പമ്പിനുള്ളില് വിശ്രമിക്കുന്ന ദൃശ്യങ്ങൾ പമ്പിലെ സി.സി.ടി.വി ക്യാമറയിൽ പതിഞ്ഞിട്ടുണ്ട്. കഴിഞ്ഞ ദിവസം രാത്രിയിലാണ് പുലി പമ്പിന്റെ പരിസരത്ത് എത്തിയത്. ശബരിമല വനമേഖലയോട് ചേർന്നുകിടക്കുന്ന പ്രദേശമാണെങ്കിലും പുലിയിറങ്ങിയ പമ്പിന് തൊട്ടടുത്തായി അട്ടത്തോട് ഗവൺമെന്റ് ട്രൈബൽ സ്കൂളും നിലയ്ക്കൽ മഹാദേവ ക്ഷേത്രവും സ്ഥിതി ചെയ്യുന്നുണ്ട്. ഇത് പ്രദേശവാസികളിലും ഭക്തരിലും വലിയ ആശങ്കയാണ് സൃഷ്ടിക്കുന്നത്. മണ്ഡല-മകരവിളക്ക് തീർത്ഥാടന സമയങ്ങളിൽ ലക്ഷക്കണക്കിന് ആളുകളും നൂറുകണക്കിന് വാഹനങ്ങളും വന്നുപോകുന്ന അതീവ തിരക്കേറിയ മേഖലയാണിത്.
തീർത്ഥാടന സീസണുകളിൽ സാധാരണയായി വന്യമൃഗങ്ങൾ ഈ ഭാഗത്തേക്ക് അധികം ഇറങ്ങാറില്ലെങ്കിലും നിലവിൽ തിരക്കില്ലാത്ത സമയമായതിനാൽ വന്യമൃഗങ്ങളുടെ സാന്നിധ്യം വർദ്ധിക്കുന്നത് ഗൗരവത്തോടെ കാണേണ്ടതുണ്ട്. അട്ടത്തോട് സ്കൂളിലെ കുട്ടികൾക്കും ക്ഷേത്രത്തിലെത്തുന്ന ഭക്തർക്കും പമ്പിലെ ജീവനക്കാർക്കും പുലിയുടെ സാന്നിധ്യം വലിയ സുരക്ഷാഭീഷണിയാണ് ഉയർത്തുന്നത്. വനംവകുപ്പ് ഈ ഭാഗത്ത് നിരീക്ഷണം ശക്തമാക്കണമെന്നും ആവശ്യമായ മുൻകരുതലുകൾ സ്വീകരിക്കണമെന്നുമാണ് പ്രാദേശികമായി ഉയരുന്ന ആവശ്യം.
