ഹരിപ്പാട്: കുമാരപുരം പഞ്ചായത്ത് 15-ാം വാര്ഡില് താമല്ലാക്കല്- കൈതപ്പറമ്പ് റോഡിനു സമീപം വാസവാലയം വീട്ടുമുറ്റത്ത് റോഡരികിലെ ആഞ്ഞിലി മരത്തിലുള്ള പുലിക്കടന്നല് കൂട് നാടിനു ഭീഷണിയായി. ഒന്നര മാസം മുമ്പ് വാര്ഡ് മെമ്പര്ക്കും പഞ്ചായത്ത് സെക്രട്ടറിക്കും പരാതി നല്കിയെങ്കിലും യാതൊരു നടപടിയും സ്വീകരിച്ചിട്ടില്ലെന്ന് നാട്ടുകാര് പറയുന്നു. നിരവധി സ്കൂള് കുട്ടികളും കാല്നട യാത്രക്കാരും വാഹനങ്ങളും നിരന്തരം കടന്നുപോകുന്ന റോഡാണിത്. അപകടകാരികളാണ് പുലിക്കടന്നലുകള്. വനം വകുപ്പിലും ഫയര് ഫോഴ്സിലും പരാതി പറഞ്ഞിട്ടും ഫലമുണ്ടായില്ല. ദിവസങ്ങള് കഴിയും തോറും കൂടിന്റെ വലിപ്പവും കടന്നലുകളുടെ എണ്ണവും കൂടി വരികയാണ്.
