കോന്നി : തണ്ണിത്തോട് കോന്നി റോഡില് പാറ ഉത്പന്നങ്ങള് കയറ്റിയ ടിപ്പര് ലോറികള് അപകടഭീഷണി ഉയര്ത്തുന്നു. പയ്യനാമണ്ണില് നിന്നുള്ള പാറമടകളില് നിന്നും ജില്ലയുടെ വിവിധ ഭാഗങ്ങളിലേക്കും മറ്റ് ജില്ലകളിലേക്കും ദിവസേനെ നിരവധി ലോറികളാണ് പാറ ഉത്പന്നങ്ങള് കയറ്റി പോകുന്നത്. പാറ ഉത്പന്നങ്ങള് കൊണ്ടുപോകുന്ന ടിപ്പറുകള് ലോഡ് കയറ്റിയ ഭാഗം മറച്ച് മാത്രമേ കൊണ്ടുപോകാവു എന്ന നിയമം നിലനില്ക്കേയാണ് ഇത്തരത്തില് പാറ ഉത്പന്നങ്ങള് കയറ്റി കൊണ്ടുപോകുന്നത്.
ബൈക്ക് യാത്രക്കാരാണ് ഇത് മൂലം ഏറ്റവും കൂടുതല് ബുദ്ധിമുട്ട് അനുഭവിക്കുന്നത്. ലോറികളില് നിന്ന് പറക്കുന്ന പാറ പൊടി ബൈക്ക് യാത്രക്കാരുടെ മുഖത്തും കണ്ണിലും വീഴുന്നതും പതിവാണ്. കണ്ണില് വീണാല് വാഹനങ്ങള് നിയന്ത്രണം വിട്ട് അപകടത്തില് പെടുന്നതിനും സാധ്യതയേറെയാണ്. വിഷയത്തില് പോലീസും ബന്ധപ്പെട്ട വകുപ്പുകളും അടിയന്തിര നടപടി സ്വീകരിക്കണമെന്നും ആവശ്യമുയരുന്നു.
