റാന്നി : നിര്മ്മാണം നടക്കുന്ന പുനലൂര്-മൂവാറ്റുപുഴ റോഡില് ബ്ലോക്കുപടിയില് നിയന്ത്രണം നഷ്ടമായ കൂറ്റന് ലോറി കുടുങ്ങിയതു മൂലം പൊതുജനം വലഞ്ഞതു ഒന്നര മണിക്കൂര്. പത്തനംതിട്ട, കോഴഞ്ചേരി, റാന്നി ഭാഗത്തു നിന്നുമെത്തിയ വാഹന യാത്രക്കാരാണ് പെരുവഴിയില് ഒന്നര മണിക്കൂര് കുടുങ്ങിയത്.
പത്തനംതിട്ട ഭാഗത്തു നിന്നെത്തിയ കൂറ്റന് ലോറി കോഴഞ്ചേരി റോഡിലേക്ക് തിരിഞ്ഞതോടെയാണ് ഗതാഗതകുരുക്ക് രൂപപെട്ടത്. ലോറി മുന്നോട്ടും പിന്നോട്ടും ഇല്ലാതായതോടെ ഇരു റോഡിലും ഗതാഗതകുരുക്കായി. ഇന്ന് ഉച്ചയ്ക്ക് രണ്ടു മണിയോടെയാണ് സംഭവം. വിവരമറിഞ്ഞ് പോലീസും അഗ്നിശമന സേനയുടെ റാന്നി യൂണിറ്റംഗങ്ങളും സ്ഥലത്തെത്തിയെങ്കിലും അവരും കാഴ്ചക്കാരായി.
ഒടുവില് റോഡു നിര്മ്മാണ കമ്പനിയുടെ ടിപ്പര് ലോറിയുപയോഗിച്ച് കയറു കെട്ടി വലിച്ചാണ് ലോറി മാറ്റിയത്. സിമന്റു കൊണ്ടു പോകാന് ഉപയോഗിക്കുന്ന ലോറി വലിയ വളവു തിരിയാതെ വന്നതോടെ നിയന്ത്രണം നഷ്ടപ്പെട്ടാണ് റോഡിന് കുറുകെയായത്. വളവ് തിരിയുന്നതിന് പിന്നോട്ടെടുത്തപ്പോള് ലോറിയുടെ നിയന്ത്രണം നഷ്ടമായി മുന്നോട്ടു പോയെങ്കിലും നാശനഷ്ടങ്ങള് ഉണ്ടായില്ല.
