അടൂര് : പൊട്ടാറായ ടയറുകളുമായി പാറയും മണ്ണും കയറ്റി തിരക്കുള്ള അടൂര് നഗരത്തിലൂടെ തലങ്ങും വിലങ്ങും പായുന്ന ടിപ്പര്ലോറികള് ജനങ്ങള്ക്ക് ഭീഷണിയാകുന്നു. പല ലോറികളുടെയും ടയറുകള് തേഞ്ഞ് ഉള്ളിലെ നൂല് കമ്പികള് വരെ തെളിഞ്ഞ അവസ്ഥയിലാണ്. ഈ ടയറുകളുള്ള ലോറികളിലാണ് അമിത ഭാരം നിറച്ച് ചീറിപ്പായുന്നത്. അടൂര് നഗരത്തില് അടക്കം മോട്ടോര് വാഹന വകുപ്പും പോലീസും ഭാരം കയറ്റി പോകുന്ന ലോറികളില് പരിശോധന നടത്താറുണ്ടെങ്കിലും വാഹനങ്ങളുടെ ടയറുകളോ ഇതിന്റെ ഗുണനിലവാരമോ പരിശോധനയ്ക്ക് വിധേയമാക്കുന്നില്ല. കട്ട ചെയ്ത സെക്കണ്ട് ഹാന്ഡ് ടയറുകള് പോലും പല വാഹനങ്ങളിലും ഉപയോഗിക്കുന്നുണ്ട് എന്നതാണ് ഞെട്ടിക്കുന്ന വസ്തുത. എപ്പോള് വേണമെങ്കിലും പൊട്ടാറായ ഇത്തരം ടയറുകള് വലിയ അപകട ഭീഷണിയാണ് ഉയര്ത്തുന്നത്.
യാതൊരു സുരക്ഷാ മാനദണ്ഡങ്ങളും പാലിക്കാതെ കടന്നുപോകുന്ന ടിപ്പര് ലോറികളും അടൂരില് വര്ധിക്കുന്നുണ്ട്. ഏനാത്ത് – അടൂര് എം.സി റോഡിലൂടെയും പഴകുളം – പള്ളിക്കല്- ആനയടി- കൂടല് റോഡിലൂടെയും യാതൊരു വിധ സുരക്ഷയും പാലിക്കാതെയാണ് ടിപ്പര് ലോറികള് അമിത ഭാരം കയറ്റി പായുന്നത്. ഭാരം കയറ്റിപോകുവാന് ലോറികള്ക്ക് നല്കുന്ന പാസുകളില് പറയുന്ന പല കാര്യങ്ങളും ഇവര് പാലിക്കുന്നില്ല എന്നും ആക്ഷേപമുണ്ട്. ജനത്തിരക്കുള്ള റോഡുകളിലും വളവുകളിലും ചീറിപ്പായുന്ന ലോറികള് ചെറിയ വാഹനങ്ങള്ക്ക് കൂടുതല് ഭീഷണിയകുന്നുണ്ട്. ടിപ്പര് ലോറികളുടെ വേഗപ്പാച്ചിലില് നിന്നും തലനാരിഴയ്ക്കാണ് വാഹനയാത്രക്കാര് രക്ഷപെടുന്നത്. പോലീസും മോട്ടോര് വാഹനവകുപ്പും ഈ വിഷയത്തില് അടിയന്തിര നടപടികള് സ്വീകരിക്കേണ്ടത് ആവശ്യമാണ്.
