കോഴഞ്ചേരി: ആറന്മുള പോലീസ് സ്റ്റേഷൻ പരിധിയിലെ പ്രധാന ടൗൺ ആയ കോഴഞ്ചേരിൽ ഓണക്കാലം മുൻ നിർത്തി ഗതാഗതക്കുരുക്കുകൾ കുറയ്ക്കുന്നതിന്റെ ഭാഗമായി വാഹന പരിശോധനയും അനധികൃത പാർക്കിങ്ങ് ഒഴിവാക്കുന്നതിനുള്ള നടപടികളും ആറന്മുള പോലീസ് ആരംഭിച്ചു. ഇതിൻറെ ഭാഗമായി കോഴഞ്ചേരി ടൗണിലെ സി കേശവൻ സ്മാരകത്തിന് സമീപം പൊയ്യാനിൽ പ്ലാസയ്ക്ക് മുൻവശമുള്ള ബസ് സ്റ്റോപ്പിൽ നിർത്താതെ ബസുകൾ മുന്നിലുള്ള റോഡിൽ നിർത്തി ആളെ ഇറക്കുകയും കയറ്റുകയും ചെയ്യുന്നതുമൂലം സ്ഥലത്ത് ഗതാഗതക്കുരുക്ക് ഉണ്ടാക്കുന്നതായി കണ്ടതിനെ തുടർന്ന് ബസ് സ്റ്റോപ്പിൽ നിന്ന് അനധികൃതമായ പാർക്കിംഗ് മറ്റും ഒഴിവാക്കിയതിന് ശേഷം ബസ്സുകൾ കയറി ഇറങ്ങി പോകുന്നതിന് പ്രത്യേകം വഴികൾ മാർക്ക് ചെയ്തു ബാരിക്കേഡ് വെച്ച് കെട്ടി തിരിച്ചു.
ഇങ്ങനെ തയ്യാറാക്കിയ ബസ് ബേയിൽ കയറാതെ റോഡിൽ ഗതാഗത തടസ്സം ഉണ്ടാക്കിയ പത്തോളം ബസുകൾക്കെതിരെ പെറ്റി കേസുകൾ എടുത്തു. അനധികൃതമായി ബസ് ബേ യിൽ പാർക്ക് ചെയ്ത് പതിനഞ്ചോളം മറ്റു വാഹനങ്ങൾക്കെതിരെയും പെറ്റി കേസുകൾ എടുത്തു. ബസ് ബേയിൽ തടസ്സം ഉണ്ടാകുന്ന തരത്തിൽ കച്ചവടം നടത്തുന്ന ആൾക്കാരെയും അവിടെ നിന്നും ഒഴിവാക്കാന് തീരുമാനിച്ചു. ബസ് സ്റ്റോപ്പിൽ തടസ്സമായി കിടക്കുന്ന പോസ്റ്റുകൾ നീക്കം ചെയ്യുന്നതിന് കെ എസ് ഇ ബി അധികൃതർക്ക് നിർദേശം നൽകി.
ഓണക്കാലത്ത് പാർക്കിങിന് പ്രത്യേക സ്ഥലം കണ്ടെത്തുന്നതിന് കോഴഞ്ചേരി ഗ്രാമ പഞ്ചായത്തുമായി ആലോചിച്ച് നടപടികൾ സ്വീകരിക്കും. ഓണക്കാലത്ത് തിരക്കൊഴിവാക്കുന്നതിനു വേണ്ടി കോഴഞ്ചേരി ടൗണിൽ ഇനിയും പരിശോധനകൾ ശക്തമാക്കും. അനധികൃത പാർക്കിങ്ങിനും വൺവേ വയലേഷനും വാഹനങ്ങൾക്കും കാൽനടയാത്രക്കാർക്കും തടസ്സമുണ്ടാകുന്ന രീതിയിൽ റോഡിലേക്ക് ഇറക്കി വെച്ച് കച്ചവടം നടത്തുന്ന സ്ഥാപനങ്ങൾക്കെതിരെയും മറ്റും കർശന നടപടികൾ സ്വീകരിക്കുന്നതാണെന്നും ആറന്മുള ഇന്സ്പെക്ടര് സി.കെ മനോജ് പറഞ്ഞു.
