പത്തനംതിട്ട : പുനലൂര് – മൂവാറ്റുപുഴ സംസ്ഥാന പാതയിലെ പ്രധാന ജംഗ്ഷനുകളില് ഒന്നായ മല്ലശേരിമുക്കില് വാഹനാപകടങ്ങള് കുറയ്ക്കുന്നതിന്റെ ഭാഗമായി സ്ഥാപിച്ച ഡിവൈഡര് സ്റ്റമ്പുകളും തകര്ത്ത് വാഹനങ്ങളുടെ മരണപ്പാച്ചില്. പുനലൂര് – മൂവാറ്റുപുഴ പാത നിര്മ്മാണം പൂര്ത്തിയാക്കി തുറന്നു നല്കിയ ശേഷം നിരവധി വാഹനാപകടങ്ങളാണ് മല്ലശേരി മുക്കില് നടന്നിട്ടുള്ളത്. ഇത് ഒഴിവാക്കുന്നതിന്റെ ഭാഗമായി ഈ ജംഗ്ഷനില് സ്ഥാപിച്ച ഡിവൈഡര് സ്റ്റമ്പുകളാണ് ചുരുങ്ങിയ കാലത്തിനുള്ളില് വാഹനങ്ങള് കയറിയിറങ്ങി പൂര്ണ്ണമായി നശിച്ചത്. 2023 – 2024 -2026 കാലഘട്ടങ്ങളിലാണ് ഇവിടെ ഏറ്റവും കൂടുതല് അപകടങ്ങള് നടന്നിട്ടുള്ളത്.
2023 ല് കാറും സ്കൂട്ടറും കൂട്ടിയിടിച്ചതിനെ തുടര്ന്ന് കാറിലുണ്ടായിരുന്ന രണ്ടര വയസുള്ള കുഞ്ഞ് ചികിത്സയില് കഴിയവേ മരണപ്പെട്ടിരുന്നു. 2024 ല് മല്ലശേരിമുക്കില് ഉണ്ടായ അപകടത്തില് കാല്നട യാത്രക്കാരന് മരിച്ചിരുന്നു. കുമ്പഴ ഭാഗത്ത് നിന്നും എത്തിയ കാര് ഇയാളെ ഇടിച്ച് തെറിപ്പിക്കുകയായിരുന്നു. 2026 ല് കാറും ബൈക്കും കൂട്ടിയിടിച്ച് കരുനാഗപ്പള്ളി സ്വദേശികളായ യുവാക്കള്ക്ക് പരിക്കേറ്റിരുന്നു. വാഹനങ്ങളുടെ അമിത വേഗതയും മഴക്കാലത്ത് റോഡില് തെന്നല് ഉണ്ടാകുന്നതും വാഹനാപകടങ്ങള്ക്ക് കാരണമാകുന്നുണ്ട്. പൂങ്കാവില് നിന്നും വരുന്ന റോഡ് മല്ലശേരിമുക്കിലാണ് സംഗമിക്കുന്നത്. പൊതുവേ വളവുള്ള ഈ ജംഗ്ഷനില് പൂങ്കാവില് നിന്നും സംസ്ഥാന പാതയിലേക്ക് കയറുന്ന വാഹനങ്ങള് ശ്രദ്ധയില്പ്പെടാതെ നടക്കുന്ന അപകടങ്ങളും അനവധിയാണ്.
