ബംഗളൂരു : തമിഴ്നാട് ധര്മപുരിക്ക് സമീപം പാളം തെറ്റിയ കണ്ണൂര് – യശ്വന്ത്പൂര് സ്പെഷ്യല് എക്സ്പ്രസിലെ (07390) യാത്രക്കാരെ ബംഗളൂരുവിലേക്ക് ബസുകളില് മാറ്റാന് നടപടിയായി. റെയില്വെ ഏര്പ്പെടുത്തിയ 15 ബസ്സുകളിലായി രാവിലെ ഒമ്പതോടെയാണ് മുഴുവന് യാത്രക്കാരെയും തോപ്പൂരില്നിന്ന് ബംഗളൂരുവിലേക്ക് കൊണ്ടുപോയത്. അപകടസ്ഥലത്ത് അഞ്ചു ബസുകളുടെ സേവനവും ഏര്പ്പെടുത്തി. രക്ഷാ പ്രവര്ത്തനം പുരോഗമിക്കുകയാണ്. വിവരങ്ങളറിയാന് 04344 222603 (ഹോസൂര്), 080 22156554 (ബംഗളൂരു), 04342 232111 (ധര്മപുരി) എന്നിവിടങ്ങളില് ഹെല്പ് ഡെസ്ക്ക് സംവിധാനം ഏര്പ്പെടുത്തി.
വ്യാഴാഴ്ച വൈകീട്ട് കണ്ണൂരില്നിന്ന് ബംഗളൂരുവിലേക്ക് പുറപ്പെട്ട ട്രെയിന് വെള്ളിയാഴ്ച പുലര്ച്ചെ 3.45ഓടെയാണ് അപകടത്തില് പെട്ടത്. സേലം – ബംഗളൂരു റൂട്ടില് മുത്തംപട്ടി – ശിവദി സ്റ്റേറഷനുകള്ക്കിടയിലാണ് സംഭവം. ട്രെയിന് ഓടിക്കൊണ്ടിരിക്കെ എന്ജിന് സമീപത്തെ എ.സി ബോഗിയുടെ ചവിട്ടുപടിയില് വന് പാറക്കല്ല് വന്നിടിച്ചതാണ് അപകടകാരണമെന്ന് കരുതുന്നു. ഏഴു കോച്ചുകള് പാളം തെറ്റിയതായി ദക്ഷിണ പശ്ചിമ റെയില്വെ അധികൃതര് അറിയിച്ചു.
