കൊച്ചി: ട്രെയിന്‍ തട്ടി യുവാവിന് ഗുരുതര പരിക്ക്. എറണാകുളം നോര്‍ത്ത് റെയില്‍വേ സ്റ്റേഷന് സമീപം ഇന്നലെ രാത്രിയോടെയാണ് സംഭവം.പാലക്കാട് നിന്നും തിരുനെല്‍വേലിയിലേക്ക് പോവുകയായിരുന്ന പാലരുവി എക്സ്പ്രസാണ് എറണാകുളം നോര്‍ത്ത് സ്റ്റേഷനും പുല്ലേപ്പടി പാലത്തിനുമിടയിലുള്ള ഭാഗത്തുവെച്ച്‌ തട്ടിയത്. ഇതോടെ ട്രെയിന്‍ ഏറെ നേരം നിര്‍ത്തിയിട്ടു.
പരിക്കേറ്റയാളെ ട്രാക്കില്‍ നിന്നും മാറ്റിയ ശേഷമാണ് യാത്ര തുടര്‍ന്നത്. എറണാകുളം നോര്‍ത്ത് പോലീസും ആര്‍പിഎഫും സ്ഥലത്തെത്തിയിരുന്നു. വിവരം അറിയിച്ചതിന്റെ അടിസ്ഥാനത്തില്‍ ഇടപ്പള്ളിയില്‍നിന്നും 108 ആംബുലന്‍സ് എത്തി യുവാവിനെ എറണാകുളം ജനറല്‍ ആശുപത്രിയിലേക്ക് മാറ്റി. തലക്ക് ഗുരുതര പരിക്ക് ഉള്ളതിനാല്‍ കളമശ്ശേരി മെഡിക്കല്‍ കോളേജിലേക്ക് കൊണ്ടുപോയി. പരിക്കേറ്റയാളെ തിരിച്ചറിഞ്ഞിട്ടില്ല.
