പാലക്കാട്: ലോകോ പൈലറ്റ് ഇറങ്ങിപ്പോയതിനെ തുടര്ന്ന് വാളയാറില് ട്രെയിന് രണ്ടര മണിക്കൂര് നിര്ത്തിയിട്ടു. യശ്വന്ത്പുര് -കണ്ണൂര് എക്സ്പ്രസാണ് വാളയാര് സ്റ്റേഷനില് നിര്ത്തിയിട്ട് ലോകോ പൈലറ്റ് ഇറങ്ങിപ്പോയത്. യാത്രക്കാരുടെ പ്രതിഷേധത്തിനിടെ രണ്ടര മണിക്കൂറിനു ശേഷം മറ്റൊരു ലോകോ പൈലറ്റ് എത്തിയാണ് സര്വിസ് പുനരാരംഭിച്ചത്. ശനിയാഴ്ച രാവിലെ ആറിനാണ് സംഭവം.
സ്റ്റോപ്പില്ലാത്ത വാളയാറിലാണ് ലോകോപൈലറ്റ് ട്രെയിന് നിര്ത്തിയിട്ട് ഇറങ്ങിപ്പോയത്. അമ്പരന്ന യാത്രക്കാര് വാളയാര് റെയില്വേ സ്റ്റേഷനില് അന്വേഷിച്ചെങ്കിലും മറുപടി ലഭിച്ചില്ല. ഇതിനിടെ, ഡ്യൂട്ടി സമയം കഴിഞ്ഞപ്പോള് ലോകോ പൈലറ്റ് ഇറങ്ങിപ്പോയതാണെന്ന പ്രചാരണത്തെ തുടര്ന്ന് യാത്രക്കാര് പ്രതിഷേധിച്ചു. ഇതിനിടെ ലോകോ പൈലറ്റ് ശാരീരിക അസ്വാസ്ഥ്യം കാരണമാണ് ട്രെയിന് നിര്ത്തി പോയതെന്ന വിശദീകരണവുമായി റെയില്വേ അധികൃതര് രംഗത്തെത്തി. ഒടുവില് 8.30ഓടെ പുതിയ ലോകോ പൈലറ്റ് എത്തി യാത്ര പുനരാരംഭിക്കുകയായിരുന്നു.
