മുക്കം : മുക്കം ഗവ. ആശുപത്രിവളപ്പില്നിന്നും സ്വകാര്യവ്യക്തി അനധികൃതമായി മരം മുറിച്ചുമാറ്റി.നൂറ്റാണ്ടിനടുത്ത് പ്രായമുള്ള ആവല് (ഞെട്ടാവല്) എന്ന കൂറ്റന് ഔഷധവൃക്ഷമാണ് മുറിച്ചുകടത്തിയത്.നേരത്തേ ഇതിന് നീക്കം നടന്നിരുന്നുവെങ്കിലും നഗരസഭ സെക്രട്ടറി സ്ഥലം സന്ദര്ശിച്ച് മരം മുറിക്കരുതെന്ന് കര്ശന നിര്ദേശം നല്കിയിരുന്നു. ആശുപത്രി വികസനവുമായി ബന്ധപ്പെട്ട് വനംവകുപ്പ് മുറിക്കാന് അനുമതി നല്കിയ മരങ്ങളുടെ കൂട്ടത്തിലും ഈ വൃക്ഷം പെടില്ല. പൊതുസ്ഥലത്തുനിന്ന് മരങ്ങള് മുറിക്കണമെങ്കില് വൃക്ഷ കമ്മിറ്റിയുടെയും വനംവകുപ്പിന്റെയും അനുമതി വേണം. ഇതെല്ലാം ലംഘിച്ചാണ് മരം മുറിച്ചുമാറ്റിയത്.
മരം മുറിച്ചുകടത്തിയത് ശ്രദ്ധയില്പെട്ടിട്ടും നഗരസഭയോ ആശുപത്രി അധികൃതരോ നടപടി സ്വീകരിക്കാത്തത് പ്രതിഷേധത്തിനും സംശയങ്ങള്ക്കും വഴിയൊരുക്കിയിട്ടുണ്ട്. അധികൃതരുടെ ഒത്താശയോടെയാണ് മരം മുറിച്ചുകടത്തിയിരിക്കുന്നതെന്ന് ആരോപിച്ച് വെല്ഫെയര് പാര്ട്ടി കൗണ്സിലര്മാരും യൂത്ത് കോണ്ഗ്രസും ബി.ജെ.പിയും പ്രതിഷേധവുമായി രംഗത്തിറങ്ങി. സി.പി.എം നേതാവിന്റെ വ്യക്തിതാല്പര്യത്തിനായി നഗരസഭാധികൃതരുടെ മൗനാനുവാദത്തോടെയാണ് മരം മുറിച്ചുകടത്തിയതെന്നും മരംകൊള്ളക്കെതിരെ നടപടി ആവശ്യപ്പെട്ട് വനംവകുപ്പിനും പോലീസിനും ജില്ല കളക്ടര്ക്കും പരാതി നല്കുമെന്നും യൂത്ത് കോണ്ഗ്രസ് നേതാക്കള് പറഞ്ഞു. നഗരസഭ തീരുമാനമോ നടപടിക്രമങ്ങളോ പാലിക്കാതെ മരംമുറിച്ചുകടത്തിയതിനെതിരെ കര്ശന നടപടി സ്വീകരിക്കണമെന്ന് ബി.ജെ.പി മുക്കം മണ്ഡലം കമ്മിറ്റി ആവശ്യപ്പെട്ടു.
