തൊടുപുഴ : വനം വകുപ്പ് ഉദ്യോഗസ്ഥര് ഓഫീസിലേക്ക് വിളിച്ചു വരുത്തി മര്ദ്ദിച്ചും ഭീഷണിപ്പെടുത്തിയും കള്ളക്കേസില് കുടുക്കിയെന്ന പരാതിയുമായി ആദിവാസി യുവാവ്. കാട്ടിറച്ചി കൈവശം വെച്ചുവെന്നാരോപിച്ച് യുവാവിനെ കള്ളക്കേസില് കുടുക്കിയതായാണ് പരാതി. ഇടുക്കി കണ്ണംപടി സ്വദേശി സരുണിനെയാണ് വനംകുപ്പ് കേസില് കുടുക്കിയത്. വനം വകുപ്പ് ഉദ്യോഗസ്ഥര് തന്നെ വിളിച്ചു വരുത്തി മര്ദ്ദിച്ചും ഭീഷണിപ്പെടുത്തിയും കേസില് കുടുക്കിയെന്നാണ് സരുണ് ആരോപിക്കുന്നത്.
സരുണിന്റെ വാഹനത്തില് നിന്നാണ് കാട്ടിറച്ചി കണ്ടെത്തിയെന്നതാണ് കേസ്. എന്നാല് മറ്റൊരു വീടിന്റെ പരിസരത്തുനിന്ന് കണ്ടെടുത്ത ഇറച്ചി സരുണിന്റെ വാഹനത്തില് നിന്നും ലഭിച്ചു എന്ന തരത്തില് ഉദ്യോഗസ്ഥര് മഹസര് തയ്യാറാക്കി യുവാവിനെ കുടുക്കുകയായിരുന്നു എന്നാണ് പരാതി ഉയരുന്നത്. ആദ്യം ഫോറസ്റ്റ് റെയ്ഞ്ച് ഓഫീസര് ഇത് കള്ളക്കേസാണെന്ന സംശയം പ്രകടിച്ചിരുന്നെന്നും എന്നാല് പിന്നീട് ഫോറസ്റ്റര് തന്നെ കേസ് കൈകാര്യം ചെയ്യുകയും യുവാവിനെ ജയിലിലേക്കയക്കുന്നതടക്കമുള്ള നടപടികളിലേക്ക് കടക്കുകയുമായിരുന്നെന്നും ആരോപണമുണ്ട്. പി.എസ്.സി റാങ്ക് ലിസ്റ്റില് ഉള്പ്പെട്ടയാളാണ് താനെന്നും കേസില് പെട്ടതോടെ സര്ക്കാര് ജോലി സാധ്യത ഇല്ലാതാകുമെന്നും സരുണ് പറയുന്നു. സംഭവത്തില് ഉദ്യോഗസ്ഥര്ക്കെതിരെ നടപടിയെടുക്കണമെന്ന ആവശ്യവുമായി ആദിവാസി സംയുക്തസമരസമിതി രംഗത്തെത്തി.
