കടുത്തുരുത്തി : പൊതു സ്ഥലത്ത് തര്ക്കം പരിഹരിക്കാന് ഇടപെട്ട പെരുവ മൈലെള്ളുംതടത്തില് രതീഷിന് (40) ആണ് കുത്തേറ്റത്. സംഭവത്തില് മുന് പോലീസുകാരന് കണ്ണൂര് ഇരിട്ടി ആനന്ദവിലാസത്തില് പ്രസാദിനെ (50) പോലീസ് അറസ്റ്റ് ചെയ്തു. വെള്ളൂര് പോലീസ് ആണ് പ്രതിയെ അറസ്റ്റ് ചെയ്തത്. ഞായറാഴ്ച രാവിലെ 8.30 ഓടെ പെരുവ ജങ്ഷനിലായിരുന്നു സംഭവം.
പെരുവ ജങ്ഷനില് ബസ് കാത്തുനില്ക്കുന്നതിനിടെ ഇടുക്കി സ്വദേശിയായ റെജിയും പ്രസാദും തമ്മില് തര്ക്കമുണ്ടായി. തുടര്ന്ന് പ്രസാദ് മര്ദിക്കാന് ശ്രമിച്ചതോടെ അതുവഴിവന്ന ബസിലേക്ക് റെജി ഓടിക്കയറി. പിന്നാലെയെത്തിയ പ്രസാദ് വീണ്ടും ആക്രമിക്കാന് ശ്രമിക്കുമ്പോഴാണ് രതീഷ് ഇടപെടുന്നത്. ഇതിനിടെയാണ് പ്രസാദിന്റെ കുത്ത് രതീഷിനേല്ക്കുന്നത്. ബഹളത്തിനിടെ റെജി ബസില് നിന്നുമിറങ്ങി ഓട്ടോറിക്ഷയില് കയറി രക്ഷപ്പെട്ടു. നാട്ടുകാര് അറിയിച്ചതിനെ തുടര്ന്ന് വെള്ളൂര് സി.ഐ പ്രസാദിന്റെ നേതൃത്വത്തില് പോലീസ് പ്രതി പ്രസാദിനെ അറസ്റ്റ് ചെയ്തു. കോടതിയില് ഹാജരാക്കിയ ശേഷം പ്രതിയെ റിമാന്ഡ് ചെയ്തു.
