കണ്ണൂര്‍ : മഞ്ഞള്‍ കൃഷിക്ക് പേരുകേട്ട മലപ്പട്ടം ഗ്രാമത്തിലെ കര്‍ഷകര്‍ക്ക് സുവര്‍ണ കാലം. വിപണിയില്‍ 90 രൂപ വിലയുള്ള മഞ്ഞള്‍ 110 രൂപ നല്‍കിയാണ് കര്‍ഷക കൂട്ടായ്മയായ മലപ്പട്ടം സ്പൈസസ് കമ്പനി കര്‍ഷകരില്‍ നിന്ന് സംഭരിച്ചത്. കര്‍ഷകരില്‍ നിന്ന് സുഗന്ധവ്യഞ്ജനങ്ങള്‍ വാങ്ങി മൂല്യവര്‍ധിത ഉല്‍പന്നമാക്കി വിപണനം നടത്തുക എന്ന ലക്ഷ്യത്തോടെ ആരംഭിച്ച മലപ്പട്ടം സ്പൈസസ് കമ്പനി ഓണത്തിന് വിപണിയില്‍ എത്തിക്കുന്നത് 20 കിന്റല്‍ മഞ്ഞള്‍.
മഞ്ഞള്‍ കര്‍ഷകരെ പ്രോത്സാഹിപ്പിക്കാന്‍ മലപ്പട്ടം ഗ്രാമ പഞ്ചായത്ത് ഭരണസമിതി പ്രത്യേക പദ്ധതി തയ്യാറാക്കിയിരുന്നു. ഇതിലൂടെ 250 പേര്‍ പദ്ധതിയുടെ ഭാഗമായി കൃഷി തുടങ്ങി. ഇവര്‍ ഉല്‍പ്പാദിപ്പിക്കുന്ന മഞ്ഞള്‍ സംഭരിച്ച്‌, സംസ്‌കരിച്ച്‌ വിപണിയിലെത്തിക്കുകയാണ് മലപ്പട്ടം സ്പൈസസ് കമ്ബനി. മഞ്ഞള്‍ പൊടി, വിത്ത്, ഉണക്കിയ മഞ്ഞള്‍ എന്നിങ്ങനെയാണ് വില്‍പ്പന. ഓണത്തിന് 20 ക്വിന്റല്‍ മഞ്ഞള്‍ ആവശ്യക്കാരിലെത്തിക്കുകയാണ് ലക്ഷ്യം. ഇതിനായി 12 ക്വിന്റല്‍ ഉണക്കിയതും അഞ്ച് ക്വിന്റല്‍ പച്ച മഞ്ഞളും സംഭരിച്ചു കഴിഞ്ഞു. ബാക്കി സംഭരണം തുടരും. സഹകരണ ബാങ്കുകളുടെ ഓണകിറ്റുകള്‍ , ഓണച്ചന്ത, വിപണനമേളകള്‍ എന്നിവ വഴി അഞ്ച് ക്വിന്റല്‍ ഇതിനകം വിറ്റഴിച്ചു. പഞ്ചായത്തിലെ കുടുംബശ്രീ പ്രവര്‍ത്തകരാണ് ഉല്‍പ്പന്നങ്ങളുടെ പാക്കിംഗ് നടത്തുന്നത്.
