തിരുവനന്തപുരം : നയതന്ത്ര സ്വര്ണക്കടത്ത് കേസിലെ പ്രധാന നാല് പ്രതികള് കൂടി ഇന്ന് ജയില് മോചിതരാകും. യു.എ.ഇ കോണ്സുലേറ്റ് പി.ആര്.ഒ ആയിരുന്ന പി.എസ് സരിത് ഉള്പെടെയാണ് ജയിലില് നിന്നിറങ്ങുന്നത്. ഇതോടെ കേസിലെ ഏതാനും പ്രതികളൊഴികെ എല്ലാവര്ക്കും ജാമ്യമാവും. രാഷ്ട്രീയ കേരളത്ത പിടിച്ചു കുലുക്കിയ കേസ് ജലരേഖയായി മാറുമോ. സ്വര്ണം പിടികൂടി ഒന്നര വര്ഷം ആകുമ്പോളേക്കും സ്വര്ണക്കടത്തിനപ്പുറം നിയമനടപടികള് ഒന്നും തന്നെ മുന്നോട്ടു കൊണ്ടു പോകുവാന് കഴിഞ്ഞിട്ടില്ല. കേസിന്റെ കേന്ദ്ര ബിന്ദുവായിരുന്ന സ്വപ്ന സുരേഷിനും സന്ദീപ് നായര്ക്കും പിന്നാലെ സരിത്തും പുറത്തേക്ക്.
കേസില് ഏറ്റവും ആദ്യം പിടിയിലായത് സ്വര്ണം അടങ്ങിയ നയതന്ത്ര ബാഗ് വാങ്ങാനെത്തിയ സിരത്തായിരുന്നു. വിമാനത്താവളത്തില് നിന്ന് പരിശോധന കൂടാതെ സ്വര്ണം പുറത്തെത്തിക്കുന്ന ചുമതലയുള്ള സരിത് കേസിന്റെ മുഖ്യ ആസൂത്രകന് എന്നാണ് അന്വേഷണ ഏജന്സികള് ആരോപിക്കുന്നത്. മുഖ്യമന്ത്രിക്ക് അനുകൂലമായി മൊഴി നല്കാന് ജയിലില് ഉദ്യോഗസ്ഥര് നിര്ബന്ധിക്കുന്നുവെന്ന് സരിത് കോടതിയ്ക്ക് പരാതി നല്കിയതും വിവാദമായിരുന്നു.
സ്വപ്നക്കൊപ്പം ജാമ്യം ലഭിച്ചിരുന്നെങ്കിലും കൊഫേ പോസ കരുതല് തടങ്കലിന്റെ കാലാവധി തീരാത്തതിനാലാണ് മോചനം വൈകിയത്. സരിത്തിനെ കൂടാതെ കെ.ടി റമീസ്, ജലാല്, മുഹമ്മദ് ഷാഫി എന്നിവരും ഇന്ന് പുറത്തിറങ്ങും. തിരുവനന്തപുരത്തിന് പുറത്തുള്ള സ്വര്ണക്കടത്ത് ലോബിയിലെ മുഖ്യകണ്ണികളാണ് ഇവരെന്നാണ് കണ്ടെത്തല്. ഇവരും ജാമ്യത്തിലിറങ്ങുന്നതോടെ കെ.ടി റബിന്സണ് ഒഴികെ പ്രധാന പ്രതികളെല്ലാം മോചിതരാവും.