പാലക്കാട്: സ്വര്ണം മോഷ്ടിക്കാനായി അമ്മയെയും മകളെയും കൊലപ്പെടുത്തിയ കേസില് പ്രതികള്ക്ക് ജീവപര്യന്തം തടവും പിഴയും. കുരാകുര്ശി സ്വദേശികളായ സുരേഷ്, അയ്യപ്പന്കുട്ടി എന്നിവരാണ് പ്രതികള്.
പന്ത്രണ്ടുവര്ഷം മുമ്പ് പാലക്കാട് കാരാകുര്ശിയില് നടന്ന ഇരട്ടക്കൊലപാതക കേസിലാണ് മണ്ണാര്ക്കാട് മുന്സിഫ് മജിസ്ട്രേറ്റ് കോടതി ശിക്ഷ വിധിച്ചത്. ഇരട്ടക്കൊലപാതകം, അതിക്രമിച്ച് കടക്കല്, തെളിവുനശിപ്പിക്കല് തുടങ്ങി വിവിധ കുറ്റങ്ങള് പ്രകാരം പ്രതികള്ക്ക് കടുത്തശിക്ഷ നല്കണമെന്ന പ്രോസിക്യൂഷന്റെ ആവശ്യം അംഗീകരിച്ചാണ് കോടതി വിധി.
2009 ജനുവരി അഞ്ചിനാണ് കേസിനാസ്പദമായ കൊലപാതകം നടന്നത്. കാരാകുര്ശി ഷാപ്പുംകുന്നില് താമസിക്കുന്ന പരേതനായ കുത്തനില് പങ്ങന്റെ ഭാര്യ കല്യാണി, ഇവരുടെ ഇളയ മകള് ലീല എന്നിവരെ കൊലപ്പെടുത്തിയ കേസാണിത്. വെട്ടിക്കൊലപ്പെടുത്താന് ഉപയോഗിച്ചിരുന്ന ആയുധമായിരുന്നു പ്രധാന തെളിവ്. ദൃക്സാക്ഷികള് ഒന്നും ഇല്ലാത്ത ഈ കേസില് സാഹചര്യ തെളിവുകളുടെ അടിസ്ഥനത്തിലാണ് കേസ് തെളിയിച്ചത്.
